Тывада 1720 санныг «Спутник-лайт» вакцинаны эккелген

28.07.2021 Тываның Кадык камгалал яамызы ооң дугайында дыңнатпышаан, Н.Ф. Гамалея аттыг эпидемиология болгаш микробиология шинчилээр национал төптүң чаа коронавирус хамчыынга удур чогаадып кылганы холушкак угланыышкынныг «Спутник-лайт» вакциназы бо чылдың март 29-та эмнер аймааның реестринче киргенин тайылбырлаан.
Спутник-лайт чаңгыс кезектиг вакцина, азы ону 18 хардан 60 хар чедир назылыг кижилерге чаңгыс катап салып, тарыырын сүмелээн. Чаа коронавирус халдавырындан аараан соонда алды ай ажа берген ийикпе, азы тарыткан соонда алды ай эрте берген чамдык кижилерге Спутник-лайт тааржыр деп сүмелеп турар.
Чаа коронавирус халдавырынга удур тарылганы кылып эгелээнинден бээр, республикага 85 110 санныг вакцина келген. Вакцинаның бирги кезээн 83 854 кижиге тараан, тарылга планының 67,5%. А долу тарыышкынны 62 407 кижи алган, планның 50,2%.
Бо чоокку хүннерде 5400 санныг Гам-Ковид-Вак вакцина келирин манап турар.