“Кадык камгалалы” национал төлевилел чорудуу-биле Тываның ыраккы суурлары – Мугур-Аксы биле Тоора-Хемге вертолет хондурар чаа шөлдерни тудар

22.07.2021 Тыва Республиканың Баштыңының албан-хүлээлгезин түр када күүседип турар Владислав Ховалыг «Кадык камгалалы» национал төлевилелдиң “Бирги эмчи-санитар дузазы көргүзер системаны хөгжүдери» төлевилел күүселдези-биле санитар авиациязын ажыглаан эмчи дузазының чедингирин хандырарын онза контрольда алган.
Республиканың агаар суднолары сөөлгү чылдарга чедир ужудуп-хондурарынга совет үениң-ле эргижирээн шөлчүгештерин ажыглап турар. «Кадык камгалалы» национал төлевилелдиң “Бирги эмчи-санитар дузазы көргүзер системаны хөгжүдери» төлевилелди боттандырып эгелээни-биле, байдал өскерилген. Национал төлевилелдер дузазы-биле эрткен чылдарда Каа-Хем кожууннуң Сарыг-Септе вертолет хондурар шөлчүгешти эде чаарткан, а Ак-Довурак хоорайда база Эрзин суурда ындыг черлерни бүрүнү-биле септээн.
“Бистиң Тыва ышкаш онзагай регионга санитар авиациязы эргежок чугула херек - деп, Республиканың дүрген эмчи дузазының болгаш катастрофалар медициназының төвүнүң кол эмчизи Шолбан Сарыглар демдеглээн. – Дарый эмчи дузазы херек апарган малчыннарывыс чайгы үеде тайгаларже чайлаглай берген-даа боор, чедери берге черлерде чурттакчылыг суурларывыс база хөй. Адыгга туттурган малчынны дүүн чаа төпте эккелдивис. Ындыг таварылгалар таварышкылаар, ам агаар-бойдус-ла таарымчалыг болза, регионнуң кайы-даа булуңунче дораан ужуп чедип болур апарганывыска өөрүп тур мен”.
Тываның санитар авиациязы бо чылдың чүгле алды айының иштинде 111 дүрген дуза ужуудуушкуннарын кылган, а эрткен чылда - 130. Коронавирус пандемиязы-биле кыйгыртылгалар көвүдээнин тайылбырлап болур, оон аңгыда орук-транспорт озал-ондаандан когарааннарга дүрген эмчи дузазын көргүзер дээш ужуп турар.