Тыва Арат Республиканың 100 чылынга уткуштур республика найысылалында оран-саваларның даштыкы аян-шинчизинге мөөрейни чарлаан

22.07.2021 Кызылдың мэриязы Тыва Арат Республиканың 100 чылынга уткуштур сайгырлыкчы субъектилер аразынга оран-савазын чараштыр шимеп алганынга көрүлде мөөрейни чарлаан.
Шаңналдыг черлерге төлептиг тиилекчилерге хүндүлел бижиктерни болгаш акша шаңналдарын тыпсыр. Конкурс хоорайның бажыңнарын, бүдүрүлгелерниң чоок-кавы девискээрлерин чаагайжыдып, ооң даштын арыглап, байырлал шинчизи киир кааставышаан, найысылалдың архитектурлуг овур-хевирин экижидер сорулганы салган.
Бажыңнарны болгаш оран-саваны каастаарда төөгүлүг болуушкуннар-биле холбашкан дизайн дилээшкиннериниң чаа хевирлерин ажыглаары күзенчиг. Ол ышкаш хоорай чурттакчыларынга база аалчыларга байырымныг сагыш-сеткилди оттурар ужурлуг.
Мөөрейге киржир чагыгны 2021 чылдың август 10-га чедир pt_ser@mail.ru электроннуг почтаже октаар, тайылбыр алыр телефон: 2-18-21.
Мөөрейниң ажылдарын дараазында негелделер-биле үнелээр:
- Тыва Арат Республиканың тургустунганындан бээр 100 чылдаан темага хамааржыры;
- шимелдениң ужур-утказы;
- шимелдениң темага таарышканы;
- уран-шевер шимелдениң тускай онзагайы;
- эстетиктиг аяны;
- айыыл чогу.