Тываның найысылалында “Чуртталга бажыңнары болгаш хоорай хүрээлели” төлевилел чорудуу-биле «Южный» микрорайонда аллеяны чаагайжыткан

23.07.2021 “Чуртталга бажыңнары болгаш хоорай хүрээлели” национал төлевилелдиң “Таарымчалыг хоорай хүрээлелин хевирлээри” федералдыг төлевилел ачызында, Тываның найысылалында 5 дугаар школа чанында “Южный микрорайонда аллея” биле Ангара бульвары кудумчуда 25/2 бажыңның дужунда хөй-ниити девискээрин чаагайжыдары дооступ турар.
Имиртиңней берген үеде кылаштаары айыылдыг деп санаар турган кезек шөлде, кудумчу чырыын кожуп, кижи кылаштаар орукту кылган. Оон аңгыда ийи чайганыышты база бок октаар сес хааржакчыгаштарны тургускан.
«Элита» КХН тудуг организациязы ол ажылдарны кылып турар. Керээниң ниити түңү - 3 306 594,87 рубль. 2021 чылдың июль 30-де ажылдарны доозар ужурлуг турган. Бо хүнде объект 100 % белен.
Эрткен чылдың октябрьда Кызыл хоорай мэриязының чарлааны ажык бадылаашкынында ол районнуң чурттакчыларының хөй кезии “Южный” микрорайонунда ук девискээрни чаагайжыдар дээш үнүн бергенин демдеглезе чогуур. «Южный» микрорайоннуң идепкейжи чурттакчылар бөлүү ол объектини “Чуртталга бажыңнары болгаш хоорай хүрээлели” национал төлевилелге киржир кылдыр идип үндүрген.