Тывада уруглар дыштаныр чайгы лагерьлерниң ийиги сезонун сонгаарлаткан. Ада-иелер 8 (394-22) 2-70-75, 2-17-44 дугаарлыг “изиг-шугум” телефоннарынче долгап болур

Республикада эпидемилогтуг байдалдың нарыыдап турарын база уруглар дыштаныр «Байлак» лагеринге Сovid-19 халдавырлыг аарыгның өөскээнин барымдаалап, Тываның шупту чайгы дыштанылга лагерьлериниң ийи дугаар сезонун түр када соксадырының дугайында ТР-ниң Чазак Даргазының оралакчызының хүлээлгезин күүседип турар Саида Сенгии дыңнаткан. Ук шиитпирни коронавирус хамчыының нептерели-биле демисел чорудар штаб  база Тываның Чазааның Баштыңының албан-хүлээлгелерин түр када күүседип турар Владислав Ховалыг деткээн.

Бо хүнде республиканың девискээринде 165 уруглар дыштаныр лагерьлер ажылдап турар, ында 7521 назы-четпээннер хаара туттунган.

 Богун болгаш эртен лагерьлерде турар уругларны чандырар талазы-биле ажылдарны чорудар. Оларны чурттап турар черлеринче дарый болгаш айыыл чок чедирилгезин чогуур ужурлуг албан-черлери организастаар.

Уругларның кадыының байдалының, чанар хуусаазының болгаш садып алган путевказын дужаар аргалар дугайында бүгү-ле информацияны ада-иелер “Изиг-шугум”телефоннарынче долгааш, айтырып ап болур:  8 (394-22) 2-70-75, 2-17-44.

Бо чылын 180 уругларның чайгы дыштанылга лагерьлерин ажыдары көрдүнген турган. Оларның 17-зи стационар, а артканнары хүндүскү лагерьлер.

Июнь 1-ден эгелеп 148 хүндүскү лагерьлер ажылын эгелээн. Оларның 16-зы ТР-ниң Күш-ажыл яамызының социал төптериниң баазазында, а артканнары өөредилге черлеринге ажыттынган. Хүндүскү лагерьлерниң бирги дыштанылга сезону доозулган. Чайгы дыштанылга лагерьлеринге бир дугаар сезон дургузунда 6500 ажыг уруг дыштанган. Ол ышкаш июнь ортан үезинде ажыттынган 17  стационар лагерьлеринге хөй ажы-төлдүг болгаш эвээш орулгалыг өг-бүлелерден база амыдырал-чуртталгазы берге байдалдыг 1200 уругну хаара туткан.