Шуулган үезинде солун болгаш ажыктыг ужуражылга

Тываның Баштыңы албан-хүлээлгени түр үеде күүседип турар Владислав Ховалыг, Санкт-Петербург хоорайда эртип турар экономиктиг шуулганның үезинде, солун болгаш ажыктыг ужуражылгаларга киришкен. Ооң бирээзи - Россияның камгалал сайыды, чаңгыс чур-чурттуувус Сергей Шойгу-биле ужуражылга болур. Социал четкилерде бодунуң арынында ооң дугайында сонуургаткан.

 “Сергей Күжүгетович-биле ужураштым. Ол меңээ кончуг эки болду. Төрээн республиказы дээш сагыш човап, Тывада ажыл-агыйывыс кандыг байдалда чоруп турарын сонуургап айтырды. Дыка хөйнү чугаалажып четтигиптивис - регионда ажыл-иш хайымныг уламчылавышаан. Экономикада, социал адырда шиитпирлээр ужурлуг айтырыгларывыс хөй. Берге үелерде бисти кагбайн, кезээде кады чорууру дээш, аңаа өөрүп четтиргенимни илереттим. Суг үериниң берге хүннеринде ооң чагыргазында 55-ки бригаданың шериг албанныглары биске дыка дузалаан. 

Тыва Арат Республиканың тургустунгандан бээр 100 чыл болган оюн удавас төлептиг демдеглеп эрттирер ужурлуг бис. Сергей Күжүгетович бистиң шупту ажыл-чорудулгавысты, ооң ужур-утказын эки билир кижи. Иннокентий Сафьяновтуң тураскаалы кандыг болур ужурлуун, канчаар бодап турарын, мээң-биле үлешти. Сергей Күжүгетовичини күрүне ажылдакчызы деп кончуг эки билир-даа болзумза, чогаадыкчы талазын бир дугаар көрдүм. Ооң тураскаалга хамаарыштыр көрүжүн төлевилелдиң авторунга албан дамчыдар мен. Ындыг бедик деңнелден республикага деткимче чугула херек деп ажыы-биле миннип тур мен. Бистиң күжүвүске бүзүрээр мен. Бөгүн Петербургтуң делегей чергелиг шуулганында командам-биле киржип тур бис» - деп, В. Ховалыг дыңнаткан.