Тываның Баштыңы албан-хүлээлгени түр үеде күүседип турар Владислав Ховалыгның республиканың уругларынга байыр чедириишкини

Ажы-төл – бистиң эң-не үнелиг байлаавыс. Угаанныг, кадык болгаш төлептиг кижилер кылдыр өссүн дээш бүгү-ле чүүлдү кылыр дээн чүткүлүвүс, оларга ынакшылывыс төнчү чок. Амгы шагның уруглары дыка угаанныг, интернеттиң мегечилеринден бисти камгалап, амгы үениң нарын технологияларын шиңгээдип алырынга дузалажыр дагдыныкчыларывыс апарган. Тываның болгаш хөй националдыг чуртувустуң келир үези – оларның холунда. 

Бичии кызылчыларывыстан чагыгларны алдым, баштай көөрге, каттырынчыг болгаш чаптанчыг-даа, а херек кырында демдеглеп ап болур чүүлдер хөй-дүр. Бичии кижилер кажан-даа мегелевес дээр. 

Эргим чаңгыс чер-чурттугларым, чаштарывыска сагыш човангыр болуулуңар! Чайны хөглүг болгаш ажыктыг эки эрттирерин, чаа эш-өөрлер-биле таныжып алырын сеткилим ханызындан күзеп, ада-иелериңерге, кырган-ава, кырган-ачаларыңарга дузалажып чоруурун утпаңар деп, уругларга чагыдым. Силер - оларга эң чоок кижилер силер! 

Чайның эң-не чырык болгаш эргим байырлалы – Уруглар камгалалының хүнү-биле!