Владислав Ховалыг Россияның камгалал сайыды Сергей Шойгуга төрүттүнген хүнү-биле байырын чедирген

«Хүндүлүг Сергей Күжүгетович! Тыва Республиканың бүгү чонунуң мурнундан төрүттүнген хүнүңер-биле чүректиң ханызындан изиг байыр чедириишкинин хүлээп ап көрүңер!

Силерниң бүгү чуртталгаңар Төрээн чуртуңарга бараан болган. 30 чыл дургузунда күрүне деңнелдиг бедик эрге-дужаалдарга ажылдааш, салдынган сорулгаларны чедиишкинниг күүсеткеш, Россияның удуртулгазының бүзүрелин чаалап алган күрүне ажылдакчызы болгаш политик деп хүндүткелди долузу-биле бадыткаан силер. 

Эң-не берге байдалда, чоннуң эң-не бүзүреп, манап, дузалажып кээрин идегеп манаары албан - Россия Федерациязының Онза байдалдар яамызын тургускаш, 20 чыл дургузунда үзүктел чок ону удуртуп келген силер. Ам бо хүнде чурттуң айыыл чок чоруун бүзүрелдии-биле хандырып тур силер. Чүгле Россияда эвес, а бүгү-делегейде Силерниң адыңар билдингир болгаш хүндүткелдиг. 

Россияга бараан болуп, офицерниң алдар-адын бедик туткан, быжыг хамааты харыысалгалыг болурунга аныяк-өскенге үлегер болуп чоруур тыва чоннуң шак мындыг оглу бар деп, чоргаарланып чор бис. Ылаңгыя, Төрээн Тыва чуртуңарже доктаамал кичээнгей салып, деткимчени көргүзүп чорууруңарга өөрүп четтиргенивис илеретпес аргавыс чок. Шак-ла ындыг хамаарылга моон-даа соңгаар уламчылаар дээрзинге черле чигзинмес бис.

Хүндүлүг Сергей Күжүгетович, каң дег быжыг кадыкшылды, харыысалгалыг күрүне ажыл-херектеринге чедиишкиннерни сеткиливис ханызындан силерге күзедивис! 

Тываның Баштыңының албан-хүлээлгезин түр када күүседип турар Владислав Ховалыг»