Тыва көжүп чоруур 20 хире диагностика комплекстерин алыр
14.05.2021
Россияның Кадык камгалал яамызы 21 мобильдиг эмчи комплекизин садып алыр акша-хөреңгини Тывага тускайлаар.
Республика баштыңының албан-хүлээлгезин күүседип турар Владислав Ховалыг РФ-тиң кадык камгалал сайыды Михаил Мурашко-биле ужурашкаш, шинчилел кылыр болгаш өске-даа чугула дериг-херекселдер-биле чепсегленген тускай машиналар садып алырынга акшаны тускайлап бээрин дугуржуп алган.
Тывага көжүп чоруур поликлиникалар деп адаар комплекстер дыка херек деп, Владислав Ховалыг чугаалаан. Республиканың эң-не ыраккы суурларында база малчын коданнарда чонну бүрүн хаара тудар аргалыг апаар. Доктар билбес автомобильде эптээн медкомплекс чедери берге черлерже дээш тускай кылдынган техника болур. 2-ги деңнелдиң биологтуг айыылдыг эвес патогенниг микроорганизмнер-биле ажылдаар тускай чаа медицина лабораториязын садып алырынга дузаны кадарын сайыт аазаан.
Владислав Ховалыг РФ-тиң Кадык камгалал яамызының баштыңы-биле эмнелге албан черлерин – республиканың 1 дугаар база уруглар эмнелгелерин септеп, эде чаартырын, ол ышкаш чаа магнит-резонанстыг томография аппарадын садып алырын база чугаалашкан. Ужуражылга үезинде, республиканың чурттакчы чонун тарыыры-биле холбашкан айтырыгларны база көрген.
«Россияныӊ кадык камгалал яамызы мени дыӊнааш, деткиир аргаларны өөренип көөр болган» - деп, Тываның Баштыңының албан-хүлээлгезин күүседип турар Владислав Ховалыг соцчеткилерде бодунуң арнында дыңнаткан.
Возврат к списку
|