Тываның Чазаанда чаа томуйлаашкыннар

Республиканың юстиция сайыдының албан-хүлээлгезин күүседир кылдыр Сергек Хертек томуйлаткан. Ол 2003 чылда Санкт-Петербургтуң күрүнениң далай техниктиг университедин база Санкт-Петербургтуң күрүнениң полярлыг академиязын дооскан. Сергек Сергеевичиниң күш-ажылчы намдары аңгы-аңгы адырларда эрге-хоойлу угланыышкыны-биле холбашкан: Кызыл хоорайның адвокаттар коллегиязының болчукчузунга, саң-хөө яамызының юридиктиг килдизиниң консультантызынга, эрге-хоойлу эргелелиниң начальнигинге ажылдаан. Кызыл хоорай мэриязының база Чеди-Хөл кожуун чагыргазының удуртукчу эрге-дужаалдарынга ажылдаан. 

Эдуард Кууларны республиканың тарифтер талазы-биле албанның удуртукчузунда томуйлаан. Казахстанда Х.А. Ясави аттыг Казах-турк чоннар аразының университедин 2005 чылда дооскан. Ону дооскаш, даштыкы-биле экономиктиг харылзаа, инновация база инвестиция ажыл-чорудулга агентилелиниң специализинге ажылдаан. 2007 чылда, Донецк хоорайда, «ЕНКА» КХН-ниң логистика талазы-биле менеджери. 2007-2008 чылдарда Москва хоорайда «ВиАйПи Консалтинг» КХН-ниң коммерция директору. 2008 чылда – Москва хоорайда «Проктер энд Гэмбл Дистрибьюторская Компания» КХН-ниң чагыкчылар-биле ажылдаар килдистиң логистика талазы-биле специализи. Кызыл хоорай мэриязының экономика эргелелин 2008-2013 чылдарда удурткан. Дараазында чылдарда база-ла эргелеп-башкарылга ажылдарын хүлээнген. Сөөлгү чылдарда федералдыг почта албанының Тыва Республикада база Иркутск облазында эргелелдеринге ажылдап, директорнуң логистика талазы-биле оралакчызы албан-дужаалдарны ээлеп турган. 2021 чылда - «Тываэнергосбыт» АН-ның электроэнергия учеттаар килдистиң начальниги.