Владислав Ховалыг Казаньда хай-халаптың уржуу-биле кажыыдалын илереткен

 «Казань хоорайның школазынга боолаашкындан чок болган болгаш когарааннарның өг-бүлелеринге бо берге үе-шакта сагыш-сеткиливис база чүрээвис ханызындан кажыыдалды илереттивис. Бо коргунчуг болуушкун кымны-даа тоомча чок арттырбас. Чеди школачы - кем чок бичии оолдар, уруглар чок болган. Олар бурунгаар улуг идегел-биле көрүп, чүткүп чорааннар, ындыг болзажок кээргел чок каржы террорисчи аажылал оларның шупту планнарын шыйып, амы-тынын үзүп каан. Бүгү тыва чоннуң өмүнээзинден Татарстан Республиканың чурттакчыларынга качыгдалдың бо берге үезинде хараадалывысты база деткимчевисти илередип тур мен. Балыгланган кижилерге дүрген экирип, сегиирин күзедим. Бо аар-берге кажыыдалдың үезинде силер чааскаан эвес силер, силерниң аарышкыңар -  бистиң чүректеривистиң аарышкызы-дыр. Туруштуг туттуннарыңарны күзедим», – деп кажыыдалдың сөстеринде Владислав Ховалыг бижээн. 

Тываның Баштыңының албан-хүлээлгезин күүседип турар В. Ховалыг мындыг сөзүглелдиг телеграмманы Татарстанның Президентизи Р.Н. Миннихановтуң адынче чоруткан. Ол ышкаш республиканың өөредилге албан черлеринге айыыл чок чоруктуң немелде хемчеглерин алырын Өөредилге болгаш эртем база Хөй-ниитиниң айыыл чок чоруунуң яамыларынга, Тываның тус черлеринде чагырга удуртукчуларынга дааскан. 

Май-11-де, ок-боо-биле чепсегленген аныяк кижи Казаньның 175 дугаарлыг школазынче келгеш, отту ажыткан. Ооң түңнелинде, чеди школачы база ийи улуг кижи өлген, 20 кижи балыгланган.