Владислав Ховалыг Ада-чурттуң Улуг дайынының хоочуну Наталья Масловага Тиилелге хүнү-биле байырны чедирген

Тываның Баштыңының албан-хүлээлгезин күүседип турар Владислав Ховалыг республиканың чурттакчы чонунуң өмүнээзинден Ада-чурттуң дайынынга кол байырлал - Улуг Тиилелге хүнү-биле бүгү хоочуннарны төлээлээн Наталья Ивановна Масловага байыр чедирери-биле фронтучуга аалдап четкен. 

 Владислав Ховалыг Наталья Ивановна-биле ужурашкан, кандыг дуза херегин айтырып, дораан дузалажырып аазаан: «Социал ажылдакчылар доктаамал карактап турар болгаш, хомудал чок болду. Наталья Ивановна-биле харылзажып турарын, херек апарза менче дорт долгаптарын дугуруштувус. Ужуражып чугаалашкаш, дайын ооң мөзү-бүдүжүн каңнап каанын эскердим». Ол ышкаш хоочунувустуң чиик чаагай, арнында хүлүмзүрүг долганынга өөрүп, кадыын камнаарын күзээн. 

Дайынның дириг херечизи бодунуң эрткен шериг оруун Тываның Баштыңының албан-хүлээлгезин күүседип турар В. Ховалыгга төөгээн. Маслова Наталья Ивановна 1923 чылдың август 16-да, Ульяновск облазының Теренгуль районунуң Большая Борла суурга төрүттүнген. 1943 чылда «харылзаачы-телеграфист» шериг мергежилге өөредилгени эрткен. Белорусь база Украина фронтуларының составынга дайылдашкан. 1945 чылда Япония-биле дайынче харылзаачы кылдыр аъттанган. 1959 чылда Тывада көжүп клеген, оон бээр аңгы-аңгы организацияларга повар, санитарка, ажылчын күш-ажылчы орукту эрткен. 

Ада-чурттуң Улуг дайынынга көргүскен маадырлыг чоруу дээш “Германияны тиилээни дээш база “Дайынчы ачы-хавыяазы” медальдарның база юбилейлиг медальдарның эдилекчизи. Фронтучу ава ийи ажы-төлдүг, 7 уйнуктарлыг, оларның 13 уйнуктарның маадырлыг кырган-авазы.