Тывада «Звезда-Кызыл» чаа радио дамчыдылгазын эгелээн

Республиканың бирги удуртукчузу Тываның болгаш чурттуң шупту радистеринге профессионал байырлалы-биле байырны чедирип, томуйлаткандан бээр бир ай иштинде бодунуң баштайгы ажыл-чорудулгазының, чазактың ажылында эде тургузуушкуннарның, республика амыдыралында сезоннуг чугула хемчеглер – огород тарыышкыны, өртке удур ажылдарның дугайында радио дыңнакчылары-биле бодунуң үзел-бодалын үлешкен.

«Майның часкы байырлалдары-биле чонумга база силерге байырны чедирип тур мен. Күш-ажылчы байырлалдың чыскаалын билдингир чылдагааннар-биле болдурбаан бис. Ындыг болзажок, кижилер өг-бүлезинге ажыктыг дыка хөй чүүлдерни кылып алган боор. А Ада-чурттуң улуг дайынынга өндүр Тиилелгениң парадын албан эрттирер бис. Аңаа белеткелдер чоруп турар. Республиканың чурттакчы чонунга чедиишкиннерни, эң кол – кадыкшылды күзеп тур мен. Республикада радионуң чаа чалгыын ажылдадып эгелээн чугула болуушкунда киржип турарымга өөрүп тур мен. Радио бо хүнде кол информастыг шөлчүгеш бооп арткан деп бодаар мен. Ча чаа чалгыынга буругаар чедиишкинерни күзедим” – деп, Владислав Ховалыг чугаалаан. 

Республикага радионуң чаа чалгыын ажылдадыры-биле, «ТываМедиаГрупп» парлалга бажыңы биле «Звезда» РФ ЧК ТРК ААН регионга дамчыдылга чорудар үени бээр дугайында керээни апрель 21-де чарган. Радио дериг-херекселдерин салган, программа хандырылгазы чедип алдынган, радионуң харыысалгалыг ажылдакчылары өөредилгени эрткен. 

Чаа радио хүнде 5 катап, 3-3 минутада дамчыдылганы чорудар (эртенги медээлер үндүрүлгези – 07:30, 08:30, 09:30 база кежээки медээлер – 17:30, 18:30 шактарда). 104.4 FM чалгыгга чоорту «дорт дамчыдылгалар», тускай темалыг программалар үнүп эгелээри планнаттынган. 

Бо хүнде республикада 7 радио ажылдап турарын сагындыраал: «Тыва» ВКТРК, «Маяк» 103.4, «Вести ФМ» 107.5, «Радио России» 105.5, «Европа Плюс» 106.4, «АвтоРадио» 101.9, «Ретро ФМ» 105.9, «Голос Азии» 102.5.