Тываның Чазаанга чаа коронавирус халдавырының эпидемиологтуг байдалын чугаалашкан

Тываның Баштыңының албан-хүлээлгезин күүседип турар Владислав Ховалыгның удуртканы аппарат хуралында, Росхереглелхайгааралының ТР-де эргелелиниң удуртукчузу Людмила Салчак май 3-түң көргүзүү-биле, лабораторияга бадыткаттынган 15826 аарыг кижи, оларның санында 2 237 уруглар бүрүткеттинген деп дыңнаткан. 

Эрткен хонукта 3 кижи аараан. Аарыгның тарап-нептерээри 1,0 хуу (апрель 1-де – 0,6; апрель 4-де – 1,0; апрель 13-те – 0,8; апрель 24-те – 1,0; апрель 29-та – 1,0). Апрель 26-дан май 3-ке чедир 4 муниципалдыг тургузугда 20 кижиниң аарыын лабораторияг бадыткаан, 19-25 хүннеринде турганындан 9 кижи хөй. 

Кызыл хоорайда (+7), Каа-Хем (+6), Кызыл (+4) база Мөңгүн-Тайга (+3) кожууннарда аарыг кижилерниң саны немешкен. ТР-ниң Кадык камгалал яамызының май 3-те берген медээзинден алырга, 91 аарыг кижи эмнедип турар. Аарыг кижиниң үштүң бирээзи-ле, азы 24 кижи амбулаторлуг эмнээшкинде. 67 кижи эмнелгелерде чыдар, 2 кижини ИВЛ-де кошкан. 80 оруннуң 16,6 хуузу, азы 13-ү хостуг. СИЗ-тер база эмнер-биле хандырылга четчир. 

Росстаттың медээзи-биле алырга, 2021 чылдың январь 1-де Тыва Республикада 18 хардан өрү назылыг 207150 кижи бар, оларның 60% азы 124290 кижи тарыттырар ужурлуг. Россияның Кадык камгалал яамызының ажылдап кылган методиказы езугаар, 2021 чылдың октябрь ортанга чедир 124 муң улуг кижи вакцинаның бир дугаарын алган турар ужурлуг, а чыл төнчүзүнге чедир долу курсту доозар. 

Амгы үеде республикада 43 тарылга пунктулары бар. Кызыл хоорайда – 20, кожууннарда – 23. Республикаже май 2-ге чедир 46302 кезек вакцина келген, ооң 6000 хире ГамКовидВак комплектини эмнелге организацияларынче үлээн (Кызыл хоорайның поликлиникаларынче – 1700 доза, кожууннарже – 4 300 доза). Вакцинаның бир дугаарын 37589 кижиге салган, үлеттинген эмнерниң 81,3 хуузу.

Республика тарыышкын планын (бир дугаарын) 30,2 хуу күүседип (124 муң кижиниң 37589-ун тараан), ортумак российжи көргүзүгден 12,9 хуу хөй (РФ – 17,3 хуу). Эрткен неделяда тараанындан 4,2 хуу хөй. Тожу, Чеди-Хөл, Тере-Хөл кожууннарда база Кызылда тарыышкын республиканың ортумак көргүзүүнден куду. Бир дугаарын тарыткан 37589 кижиниң 8592-зи азы 28,8 хуузу 60 хардан өрү назылыг. Эмнелге организацияларында ам-даа 8 653 доза бар.