Арага продукциязын хоойлуга чөрүштүр чажыт садып-саарар чорукту илередип, ону болдурбас дээн мөөрейниң тиилекчилерин шаңнап-мактаан

Тыва Республикада иштики херектер яамызындан шылгараан ажылдакчыларны база улусчу дружинниктерни акша сертификаттары-биле шаңнаан. Ук хемчегге Тываның Баштыңның албан-хүлээлгезин күүседип турар В.Ховалыг, РФ-тиң иштики херектериниң ТР-де сайыды Юрий Поляков, ТР-ниң хөй-ниити айыыл чок чоруунуң сайыды В.К.Хулер киришкен.

 2021 чылдың бирги кварталында республика девискээринге хоойлуга чөрүштүр саарылгадан 44 тонна хоруглуг продукцияны хавырган, ооң 34 тонназы арага суксуннары база 9,5 тонназы спирт холуксаалыг суук чүүл. Эзирик байдалда корум-чурум үрээр чорук 487-ден 449-ка чедир (7,8 %) кызырылган. Элээн экижиишкин Чеди-Хөл кожуунда - 82%, Кызылда – 29%, Бии-Хемде – 27% демдеглеттинген. Аар болгаш онза аар кем-херектер саны 3,29 катап, а өлүрүкчү херектер 51 хуу кызырылганы – чажыт арага садыглаашкынга удур демиселдиң түңнели. 

Тываның Баштыңының албан-хүлээлгезин күүседип турар В.Ховалыг эрге-хоойлу камгалаар органнар ажылдакчыларының корум-чурумну камгалап, бутлегерлер-биле демиселге киирген улуг үлүг-хуузу дээш четтиргенин илереткен. «Чажыт арага саарылгазы-биле демисел бистиң кады ажылывыстың чугула кезээ болуп артар. Бирги элчегде, иштики херектер органнарының ажылдакчылары биле улусчу дружиналарның кады ажылдажылгазын быжыглаар херек. Үре-түңнелдиг ажыл-албаныңар дээш четтиргеним илередип, мөөрейде тиилелгеңер - силерниң албан хүлээлгеңерге улуг үнелел деп санап тур мен. Арага продукциязын чажыт садып-саарарынга удур чедип алган арга-дуржулгаңар, кады ажылдажылгаңар, шалыпчы ажылыңар бодунуң ээлчээнде, чонувустуң кадыкшылын эки талаже быжыглаарынга, кем-херек үүлгедиишкиннериниң деңнелин эвээжедир дээш эки көргүзүглерни эккэринге бүзүрээр мен” – деп, Владислав Ховалыг чугаалаан. 

Иштики херектер сайыды Юрий Поляков иштики херектер органнарын деткип турары дээш четтиргенин илереткеш, шылгараан полицейжилерни болгаш улусчу дружиналарны шаңнап-мактаарын көөр ведомстволар аразының комиссиязын тургузарын саналдаан. 

Тыва Республиканың девискээринге чажыт арага болгаш спирт холумактыг продукцияны садып-сарар чорукту илередип тыварынга шылгараан полицейжи (патруль бөлүү)” деп мөөрейге дараазында полицейжилер шылгараан. 

1-ги чер – РФ-тиң ИХЯ «Кызылский» (Туран) муниципалдар аразының килдизиниң ажылдакчылары - полицияның бүрүн эргелиг төлээзи Бады А.О., полицияның улуг участок төлээзи Хомушку А.К. оларга, кады чоруткан рейдилер үезинде 360 литр арага продукциязын саарылгадан хавырганы дээш 40 муң рубльдиң сертификаттары-биле шаңнаан.

 2-ги чер – РФ-тиң ИХЯ «Кызылский» (Туран) муниципалдар аразының ОШАЧКИ килдизиниң орук-патруль албанының инспекторлары Чалзып Ч.Х., Доспан С.О. В «Шивилиг» постузунга 320 литр арга продукциязын илередип тыпкан. Оларга 25 муң рубльдиң сертификаттарын тывыскан. 

3-кү черде – РФ-тиң ИХЯ «Тандынский» (Самагалтай) муниципалдар аразының килдизиниң ажылдакчылары – полицияның бүрүн эргелиг төлээзи Шаравии В.Б., оперативтиг дежурныйның дузалакчызы Кеский-оол Б.С. чажыт саарылгадан 207,7 литр арага продукциязын хавырган. Олар 15 муң рубльдиң сертификаттары-биле шаңнаткан. 

«Тыва Республиканың девискээринде тергиидээн улусчу дружина» мөөрейге дараазында тиилекчилерни үндүрген: 

Кызыл хоорайның «Енисей” эки турачы улусчу дружиназы бирги черже үнген. Кызыл хоорайның девискээринде чажыт арага садып турар черлерни илереткен 64 рейдилер үезинде 1159,5 литр арага продукциязын хавырган. Оларга 80 муң рубльдиң сертификадын тывыскан. 

Улуг-Хем кожуунда «Улуг-Хем» эки турачы улусчу дружина ийиги черни ээлээн. «Улуг-Хем» улусчу дружина 16 рейдилер үезинде чажыт садып турган 1152,5 литр арага продукциязын илередип, тыпкан. Улусчу дружина 40 муң рубльдиң сертификадын алган.

Чөөн-Хемчик кожууннуң «Хемчик» эки турачы улусчу дружинага үшкү черни берген. «Хемчик» улусчу дружинаның кежигүннери кожуун девискээринге 48 рейд үезинде 447, 7 литр чажыт арага продукциязын хавырган. Оларның шаңналы - 30 муң рубльдиң сертификады. 

Шаңнал тыпсыр езулалдың төнчүзүнде, эң-не хөй хемчээлдиг - 8490 литр спирт холумактыг продукцияны хавырганы дээш шылгараан РФ-тиң ИХЯ «Кызылский» (Туран) муниципалдар аразының ОШАЧКИ килдизиниң орук-патруль албанының инспектору Оюн Айдынга 100 муң рубльдиң сертифакадын тывыскан.