Владислав Ховалыгның Москвага ажыл-агыйжы сургакчылаашкынының түңнелдери

Владислав Товарищтайович регион чазааның бо чоокку үеде кылыр ажыл планнары-биле үлешкен. «Владимир Владимирович айылкалды дыңнап келгеннерниң хей-адын көдүрген. Ам-даа бурунгаарлаарынче кыйгырган. Ол ажылдың чугула кезээ Россияның чонун камнап, камгалаары болур. Айыткалды удуртулга болдургаш, ооң негелделерин ажыл-херектеривиске ажыглавышаан, дыка хөй айтырыгларга харыыны бээр ужурлуг бис. Чижээ, кадык камгалал, өөредилге, чоннуң социал камгалал системалары чонувуска таарымчалыг ачы-дузаларны чедирип турар бе? Баштай-ла, чонувус чок деп харыылаар боор деп, бодаар мен. Бо чоокку үеде эмчилер, башткылар болгаш өске-даа удуртукчуларны чыггаш, ол адырларда чыглы берген айтырыгларны сайгарып көөр бис. База ол ышкаш, президентиниң Айыткалда чаа инициативаларны сайгарып, даалгаларны белеткээр» – деп, Владислав Ховалыг чугаалаан. 

Тываның Баштыңы албан-хүлээлгениң күүседикчизи «Газпром межрегионгаз» КХН-ниң чиңгине директору Сергей Густов-биле телефон-биле алызы барып республикаже газты киирериниң дугайында чугаалашканын дыңнаткан. «Газпром» ПАН-ның чиңгине директору Алексей Миллерниң база Россияның энергетика сайыды Николай Шульгиновтуң адынга газчыдар субъектилер санынче республиканы киирер дугайында дилегни чорудар шиитпир хүлээп алдынганын чугаалаан. 

«2030 чылга чедир регионнарны газчыдар бирги программаже кирбейн барганывыс, хомуданчыг. Президент бирги программаже кирбейн барган Федерация субъектилерин газ-биле хандырарын чедип алыр чогуур программаны Россияның Чазаа регионнар-биле кады ажылдап кылырын чиге айыткан. Эң-не үстүкү деңнелде дорт шиитпир хүлээп алдынган болганда, сорулгаларны чедип ап, ону хажыт чокка күүседири арткан-дыр» – деп, Владислав Ховалыг демдеглээн.