Тыва Республиканың Дээди Хуралының депутаттарынга регион баштыңының хүлээлгезин түр када күүседир Владислав Ховалыгны таныштырган

Бөгүн, Кызылга, Дээди Хуралдың депутаттарынга, күүсекчи эрге-чагырганың регион органнарының база тус чер бот-башкарылга органнарының удуртукчуларынга Тыва Республиканың Баштыңы хүлээлгениң түр када күүседикчизи Владислав Ховалыгны таныштырган. 

Россия Федерациязының Президентизиниң 2021 чылдың апрель 7-де № 197 чарлыы-биле Владислав Товарищтайович Ховалыгны Тыва Республиканың баштыңының хүлээлгезин түр кад күүседир кылдыр томуйлаан. 

«Владислав Товарищтайович улуг профессионал арга-дуржулгалыг болгаш күрүне, муниципалдыг база корпоративтиг эргелеп-башкарылга адырында улуг билиг-мергежилдиг» – деп, Россия Федерациязының Президентизиниң бүрүн эргелиг төлээзиниң оралакчызы Вадим Головко демдеглээн. 

Владислав Ховалыг – Тыва Республикага төрүттүнген, күш-ажылчы допчу-намдары төрээн чурту-биле тудуш. Эрге-чагырга органнарының удуртукчу албан-дужаалдарынга чээрби ажыг чылдарда ажылдаан болгаш, республикада байдалды ханы болгаш дыка эки билир.

«Владислав Товарищтайовичиниң регионга ооң мурнунда чылдарда удуртулга ажылдарынга чыып алган арга-дуржулгазы, профессионал билиг-мергежили, сыныш чок тура-соруу, ажыл-херээнге ынаа республиканың социал-экономиктиг хүгжүлдезинге чаа идигни бээр дээрзинге бүзүрээр мен» – деп, бүрүн эргелиг төлээниң оралакчызы чугаалаан. 

Тыва Республика – культура-төөгү болгаш сагыш-сеткил талазы-биле байлак өнчүлүг Россияның онзагай региону болур болгаш, ооң чараш бойдузу региондан дашкаар безин билдингир. «Республикада бар улуг курлавырларны Россия Федерациязының Президентизиниң чурттакчы чонунуң амыдырал байдалын экижидер дээн сорулгазын күүседиринге боттуг ажыглап болур» – деп, Вадим Головко демдеглээн. 

Регионнуң удуртулгазы чедиишкинниг бурунгаарлаарынга Россия Чазааның бадылааны 2020-2024 чылдарда Тыва Республиканың социал-экономиктиг хөгжүлдезиниң тускай программазын боттандырарынче күжениишкиннерни салыры чугула. Ол документиде чуртталга тудуушкунун, биче болгаш ортумак бизнести, көдээ ажыл-агый бүдүрүлгезин, туризмни болгаш өске-даа угланыышкыннарны хөгжүдерин деткиир тускай хемчеглер кирген. 

Депутаттар корпузу, күүсекчи эрге-чагырганың федералдыг органнарының девискээр органнары база тус чер бот-башкарылга органнарының демниг ажылдажылгазын организастаары регион чазааның мурнунда шиитпирлээр айтырыг ол болур. «Ажыл-агыйжы бөлүктер, хамааты ниитилел институттары демниг ажылдажылганы уламчылап, республиканың чурттакчылары-биле ажык харылзааны тудары эң кол» – деп бүрүн эргелиг төлээниң оралакчызы чугаалаан. 

Тайылбыр: Владислав Товарищтайович Ховалыг 1967 чылдың декабрь 24-те Тыва АССР-ниң Бай-Тайга районнуң Тээли суурга төрүттүнген. 1992 чылда Красноярсиниң күрүне университединиң социал-эрге-хоойлу факультедин дооскан. Россия Федерациязының Чазаанда Улус ажыл-агый академиязының экономика болгаш саң-хөө факультединиң 2006 чылда доозукчузу. Тыва Республиканың Өнчү-хөреңги комитединиң эрге-хоойлу айтырыгларының талазы-биле кол специализи болуп 1992 чылдан 1994 чылга чедир ажылдаан. 1994 чылдан 2004 чылга чедир Россия Федерациязының саң-хөөнү экижидер болгаш хоозуралды болдурбас талазы-биле федералдыг албанның Тывада территориалдыг органын удурткан. 2004-2007 чылдарда – Тыва Республиканың Саң-хөө яамызының бюджет акша-хөреңгизин эгидер талазы-биле килдистиң начальниги, күрүне садыглажылгазының департамент начальниги. 2007-2008 чылдарда Тываның чер болгаш өнчү хамаарылгаларының сайыды албан-дужаалга ажылдаан. 2008 чылдан 2018 чылга чедир Кызыл хоорайның мэри. «Тываэнергосбыт» акционерлиг ниитилелдиң чиңгине директорунга 2018-2021 чылдарда ажылдаан.