Шолбан Кара-оол долу күжү-биле ажылдаарын командазынга чагаан

 Средада, Россияның Президентизи Владимир Путин Шолбан Кара-оолдуң билдириишкининге даянгаш, бүрүн эргелеринден хостаар дугайында чарлыкка атты салган. Шолбан Кара-оол деңзигүүрлеп тургаш, халажылгаже эки тура чорутканын дыңнаткан. Республика баштыңының албан-дужаалынга Владислав Ховалыгны түр када томуйлаан.

Шолбан Кара-оол: - Владислав Товарищтайович-биле Москвадан чаа ужуп келдивис. Тываның шупту соңгукчылары, чону дыңнаан боор. Дүүн, апрель 7-де, президентиниң адынга бодум өмүнээмден дилег чагааны киирген кижи мен. Оон кол утказы - 14 чыл ишти республиканы удуртуп баштадым, о дыка улуг болгаш көвей үе-дир. Ынчангаш бүзүрел дээш, чонумнуң деткимчези дээш, улуу-биле четтирип тур мен. Ынчалза-даа ажыл турбас ужурлуг, ам-даа сайзыраар, көвүдээр, чедиишкиннер дээш ажылдаар. Эрге-чагыргада кижилер бодунуң талазындан кызымак, шудургу ажылын көргүзер ужурлуг. 

Дүүн Россияның Президентизи мээң ол дилээмни күүседип берген, ынчангаш улуг, бедик эрге-чагыргадан халажып турарым бо. Владислав Товарищтаевич бодунуң эрге-чагыргазын дүүн хүлээп алган кижи. “Улуг удуртукчузу” деп бедик эрге-чагырганы удуртуп эгелээн. Бо хүннерде эрге-чагырганың кол угланыышкыннарын хүлээдир мен. Хоойлу-дурүм-биле алыр болза, амгы эрге-чагыргада кижилер бодунуң эрге-дужаалын чаа Чазак хевирлеттинеринге чедир шупту кызымак, шудургу күүседир ужурлуг. Кижилерниң кызымаандан, кайы хире туруштуундан, харыысалгалыг ажылындан ол хамааржыр. Ынчангаш эрге-чагыргада эш-өөрүмден дилээм –сулараңгай байдалды тургуспайн, эки, оон-даа күжениишкинниг ажылдаар. Эрге-чагыргада кижилерниң хөй кезии аныяктар силер, ынчангаш ам-даа күжениишкинниг ажылдаарын дилээр-дир мен. Бистиң бо ажылывыстың артында эң-не кол чүүл – Тывавыска ынаавыс, Тывавыстың сайзыралы дээш чүткүлүвүс турар. Тыва - өгбелеривистиң артырып бергени чер-чуртувус тур. Ынчангаш ооң сайзыралы бир-даа минута, бир-даа секундада доктаавас ужурлуг. Сайзырал - эрге-чагыргадан дыка хамааржыр. Эрге-чагырга үелиг болур, эрге-чагыргада доктааткан үеде мен деп силерге чугаалап чораан мен. Ынчангаш билдириишкинни бижиирде, бодумнуң туружум шак ындыг турган. 

Бо 14 чыл иштинде ажылдап каан ажыл-херээмни кажанда-даа хир-чамга боравас мен, ол - чуртталгамның эң-не солун талалары, эң-не чымыштыг үези-дир. Ынчангаш кандыг-даа хир-чамныг, сагыш-бодалдыг кижилерге ону дээртпес деп бодал-биле бо ажылымны Улуг Даргам таварыштыр хүлээдип берип турарым бо. Эрткен оруумда шаам-биле чүткүттүм, аңаа төөгү бодунуң үнелелин бере бээр деп чүвеге мен бүзүрээр мен. Чонум база үнелелди бээр боор.

Эң-не кол чүве - төөгү дугайында чугаалаары эвес, а бөгүнгү чедиишкинче кайы хире чүткүдүп, ону чедип алганывыс база ооң деңнелин кудулатпас дээш ажылдаары кол. Чедиишкиннерден бедик, оон-даа ырадыр өзер ужурлуг бис. Ынчангаш мээң базымым артында шак бо мындыг шимчээшкиннер бар. Чонум-биле чугаалажып, сүмележи бээр бис. Кайнаар-даа чорбаан мен. Хар-назынымны алыр чүве болза, хүндүлүг дыштанылгаже база белеткенмейн тур мен. Ажырбас, Тывам дээш ам-даа ажылдаар үүлем бар дээрзинге бүзүреп чоруур мен. Улуг даргавыс-биле ооң дугайында база чугаалаштывыс. Ынчангаш хүндүлуг чонум, эмин эрттир муңгараан, девидеп халаан ажыы чок. Эрге-чагырганың болур ужурлуг базымы-дыр, чаа эрге-чагырга оон-даа күжениишкинниг, оон-даа чедиишкинниг ажылдай бээринге бүзүрээр мен. 

Владислав Ховалыг: - Шолбан Валерьевич бөгүнде Чазак кежигүннеринге болгаш республиканың шупту удуртукчуларынга кыйгырыгны берген. Ажылды суларадып болбас, ол шапкын, кидин-түлүк турар ужурлуг деп. Бо чоокку үеде ажыл угланыышкынарында кандыг чаа төлевилелдер тыптып кээри, кандыг айтырыглар тургустунуп келири ажылдап турувуста көстүп кээр ужурлуг.