Аңнаарының болгаш аңныыр сезонунуң хуусаазының дугайында дүрүмнерде өскерилгелерни киирген

ТР-ниң Баштыңының 2021 чылдың март 30-де 67 дугаарлыг чарлыы-биле, республиканың аңныыр черлеринге аңнаашкынны чорударының параметрлеринче өскерлиишкиннерни киирип, аңнаашкында “чаа” хуусааларны тургускан.

 Россияның Бойдус яамызының 2020 чылдың июль 20-де 447 дугаарлыг дужаалы-биле хүлээп алган Аңнаарының чаа чурумунга даянып, өскерлиишкиннерни киирери чугула болу берген. 

Эртем ниитилежилгезиниң база хоочун аңчыларның санал-оналы, хөй чылдарда чоруткан хайгаарал-шинчилелдерге база регионнуң агаар-бойдузу-биле дириг амытаннар делегейиниң объектилериниң биологтуг онзагайын база сезоннуг байдалын көрүп тургаш тургускан Аңнаарының чаа чуруму езугаар, аңнаарының хуусааларын бадылаан. 

Часкы аңнаашкынның чаа хуусаазы-биле арга-арыг куштарын аңнаары апрельдиң 15-те эгелээр болгаш 10 хонук уламчылаар, апрельдиң дөрткү субботазындан өдүректи 10 хонук дургузунда адып болур. Адыгны декабрь 31-ге чедир аңнаарын узаткан.

Аңнаарының чаа дүрүмүнде төтчеглекчилер-биле демиселдиң шынарын экижидеринче угланган чаартылгалар кирген. (Аңныыр продукциязын документ чокка аай-дедир сөөртүрүн хораан). 

Дараазында кызыгаарлаашкыннарны киирген: 

Хорааны болза: 

- черлик дириг ивиниң мыйызын кезерин; 

- часкы аңныыр үезинде эжиндирер чүүлдерни ажыглаарын; 

- муңгаш черде азы оът-сиген аразындан ужуп үнүп бар чыткан кушту адарын; 

- балыгланган дириг амытанны боо моңгузу-биле согарын; 

- коллективтиг аңнаашкын үезинде, балыгланган, ушкан, тыпканы аңче чедип, дугаардан үнерин; - үрелик боо-биле аңнаарын;

- январь 1-ден февраль 28-ке (29) чедир черлик хаванны аңчы ыттар-биле аңнаарын (балыгланган черлик хаваннардан аңгыда); 

- аңныыр черлеринге шимчеп чоруур транспорт аймаанга, ужар аппараттарга чоруурун хораан.