Тываның Баштыңы «Социал картофель» төлевилелдиң киржикчилерин калбартыр даалганы берген
06.04.2021
Тываның Баштыңы республиканың суму баштыңнарынга «Социал картофель» төлевилел шугуму-биле дуза алыкчыларының санын көвүдедир даалганы берген. Шолбан Кара-оол төлевилелче социал деткимчеге хереглелдиң хөй ажы-төлдүг өг-бүлелерни хаара тударынче онза кичээнгейни салырын негээн.
«Социал картофель» төлевилел анаа-ла үрезиннер үлээри-биле кызыгаарланмас ужурлуг. Өг-бүлеге берген боттуг дузаламчы элээн чедимчелиг байдалга эккээр эге базымнар апаарын чедип алыр херек» - деп, Шолбан Кара-оол бодунуң блогунда чаа даалгазының дугайында бижээн.
Тывага 2015 чылда эгелээн «Социал картофель» төлевилел-биле 12 муң ажыг өг-бүле боттуг дузаны алган, а чүгле эрткен чылда 20 муң хире өг-бүлеге борщ кылыр ногаалар үрезиннерин үлээн.
Тываның Баштыңы сумулар удуртукчуларынга даалганы берип тура, социал дузаламчы алган өг-бүлелер огород тарыыр арга-дуржулганы шиңгээткен турарын даандырган. Ынчангаш «Социал картофель” төлевилел киржикчилериниң бөлүүн улгаттырары-биле, шефтерни организастап, ынаар херээженнер эвилелдерин, адалар чөвүлелдерин болгаш өске-даа хөй-ниити каттыжыышкыннарын хаара тударын сагындырган.
«Төлевилелде киржип турар өг-бүлелер чүгле чаагай дүжүт алырындан аңгыда, келир чылче үрезинин шыгжап, артыкшылдыын садып алырын хандырар херек» – деп, Шолбан Кара-оол демдеглээн.
Возврат к списку
|