Губернатор төлевилели Россияның Федерация Чөвүлелинге бедик үнелелди алган
05.04.2021
Федерация Чөвүлелинге эрткен “төгерик столга” палатаның социал политика талазы-биле комитет даргазы Инна Святенко “Өг-бүле бүрүзүнге бирден эвээш эвес дээди эртемниг уруг” деп губернатор төлевилелинге бедик үнелелди берген.
Тываның Баштыңы Шолбан Кара-оолдуң саналдааны-биле эгелээн төлевилел 2014 чылдан ажылдап турар. Үш болгаш оон хөй ажы-төлдүг өг-бүлелерден абитурент уруглар бакалавриат база специалитет программазы-биле дээди өөредилге черлеринче кирерде чиигелделиг болурун Федерация Чөвүлелинге эрткен “төгерик столга” сайгарып чугаалашкан.
Комитеттиң даргазы Инна Святенко хөй ажы-төлдүг өг-бүлелерниң уруг-дарыы эртем-билиг чедип алырынга Тываның Баштыңының “Өг-бүле бүрүзүнге бирден эвээш эвес дээди эртемниг уруг” төлевилели идиглиг бооп турарын чижек кылдыр чугаалаан.
«Күрүнеден деткимче-дузага онза хереглелдиг хөй ажы-төлдүг өг-бүлелерге дыка-ла эки дуза. Социал политика талазы-биле комитеттен коллегаларым-биле кады бакалавриат биле специалитет программазы-биле өөренир дээш өскелер-биле деңге кирериниң шылгалдаларын чедиишкинниг дужааган хөй ажы-төлдүг өг-бүлелерден уругларны мурнады киир санаарын саналдаан хоойлу төлевилелин ажылдап кылдывыс» – деп, Святенко чугаалаан.
Возврат к списку
|