Тывада коронавирус инфекциязынга удур чонну тарыыры уламчылавышаан

Ол вакциналарның шуптузун республиканың эмнелге албан черлеринче тараткан, ам 229 доза арткан. Вакциналарның 98,1 хуузун азы, азы ниити тарыткан кижилерниң 13112-зинге вакцинаның бирги тарылгазын салган. 60 хардан өрү назылыг кижилерже онза кичээнгейни углаан, ол хире назылыг кижилерниң 11,7 хуузун, азы 3501 кижини тараан. 

ТР-ниң Кадык камгалал яамызы бо чоокку үеде 7800 доза, а 5-10 хонуктан бээр 1200 хире доза келирин манап турар. 

Тываның Баштыңы Шолбан Кара-оол Чазактың аппарат хуралында бодунуң оралакчызы Саида Сенгииге база кадык камгалал сайыдынга республикада ковидке удур тарылганың темпизин шапкынчыдарын негээн: 

«Пандемия эгелээнден 197 кижини ышкынган бис, оларның чартык кезии 60 хардан өрү назылыг кижилер дээрзин утпаалыңар. Халдавырны чүгле тарыышкын соксадып шыдаар, ындыг болганда, ол ажылды элээн организастыг деңнелге чорудар херек. Оралакчы С.Х. Сенгии база Тываның Кадык камгалал яамызы кээр вакциналар санын көвүдедип, ооң дүрген болгаш доктаамал кээп турарын чедип ап, чүгле эмнелгелерге эвес, а хөй кижилер чыглыр черлерге тарыышкын пунктуларын ажыдарын чедип алырын даастым». 

Марттың 31-де, Россия Чазааның даргазының оралакчызы Татьяна Голикованың удуртулгазы-биле эрткен хуралда, Саида Сенгии регионда вакцинацияның кайы хире чоруп турарын, чонну калбаа-биле хаара тудар дизе, кээр вакциналарның санын ам-даа көвүдедирин демдеглээн. 

«Республика Баштыңының даалгазы езугаар, чонну тарыырын неделя санында бодум контрольдап турар мен. Вакциналар доктаамал кээр чүве болза, республикада тарылга пунктуларынга хүнде-ле 2000-2500 хире кижини тарып болур. Бистиң респкублика ышкаш, чурттакчы чонунуң саны эвээш регионнарже чорудар вакцинаның санын көвүдедир дээн Попова Анна Юрьевнаның саналын Татьяна Алексеевна деткээн. Ынчангаш бо чоокку хүннерде 7800 доза, оон дараазында хонуктарда 1200 доза вакцинаның келирин манап турар бис. Роспотребнадзор удуртукчузунуң бадылааны езугаар, бистиң республикага көрдүнген вакциналарның арткан кезээ келир. Ковидтевээн хамаатылар чурттуң Президентизи ышкаш, тарыышкын пунктуларынга келгеш, тарыдып ап болур” – деп, Саида Сенгии демдеглээн.