«Кадыкшылдың оруу» ажылын уламчылавышаан

«Кадыкшылдың оруу» губернатор төлевилели республикада ажылын уламчылавышаан. 2021 чылдың эгезинден эгелеп эмчилер төлевилел боттаныышкыны-биле республиканың беш: Тере-Хөл, Каа-Хем, Тожу, Кызыл, Өвүр база Мөңгүн-Тайга кожуунунга четкен. 

Эмчилерниң көжүп чоруур бригадазы үнүүшкүннер үезинде 3708 кижини шинчээн, 762 кижиде аарыгларны тодарадып, 684 кижиге немелде шинчилге эртер бижиктерни берген. Ол чорааш эмчилер «Аныяк өг-бүлеге кыштаг», «Чемгерикчи инек малым», «Чаа сорук» губернатор төлевилелдериниң киржикчилерин база шинчээн. 

“Кадыкшылдың оруу” Мөңгүн-Тайга кожуунга сөөлгү катап марттың 24-26 хүннеринде ажылдаан, ынчан Мугур-Аксы биле Кызыл-Хая суурларның чурттакчыларын хүлээп алган. Эндокринолог, невролог, оториноларинголог, кардиолог, нарколог, психолог эмчилер бригадазы Мөңгүн-Тайга төп кожуун эмнелгезиниң эмчилери-биле 116 кижини хүлээп, херээжен чонга маммографтыг шинчилгени кылган. 

Бо чылдың апрель 6-9 хүннеринде эмчилер Тес-Хем кожуунче үнүүшкүннү планнаан. Невролог, оториноларинголог, окулист, УЗИ (БЦА), эндокринолог эмчилер база маммография специализи хүлээп алыышкынны кылыр.