РФ-тиң Чазаа инфраструктура объектилериниң тудуун доозар немелде акша-хөреңгини Тывага бээр
01.04.2021
Михаил Мишустин Тывага кээп чорааш берген сөзүнге ээ болган – Кызылда школа биле ийи уруглар садының тудуун доозарынга 297 млн. 665,8 муң рубль трансфертти республикага тускайлаар дугайында айтыышкынга атты салган.
Чугаа хоорайның солагай талакы дачаларында 825 олуттуг школа база Бай-Хаакская биле Полигонная кудумчуларында бирээзи-ле 280 олуттуг уруглар садының дугайында чоруп турар. Россияның Чазааның даргазы чаа өөредилге чылынга чедир объектилерни ажыглалче киирерин негээн.
Республика эмнелгезинде чаа салган дериг-херекселдер болгаш чаа терапия корпузунуң дерилгезинче үнген өрени дуглаарынче РФ-тиң Кадык камгалал шугуму-биле 352 млн. рубльди шилчидерин ол-ла айтыышкында айыткан. Ам-даа 290 ажыг эмнээшкин дериглерин немей садар.
Немей үндүрген деткимчениң ниити түңү 659 млн. 846,7 муң рубль. Федералдыг дуза республикада чугула инфраструктура төлевилелдерин доозарынга база эмчи болгаш өөредилге ачы-дузазының чедингирин экижидеринге идигни бээр.
Возврат к списку
|