Тывада кадыкшыл байдалы кызыгаарлыг өөреникчилер халас ийи катап чемненир

Өөренир хүннерде халас ийи катап чемненилгени республика бюджединиң акша-хөреңгизи-биле хандырарын Тываның Өөредилге болгаш эртем яамызы дыңнаткан. 

«Харык-шинээ кызыгаарлыг уругларның ада-иелеринге күрүнеден дузаны чедирери ол – деп, республиканың Өөредилге болгаш эртем яамызы дыңнаткан. – Өөредилге чорудуун хандырар чарыгдалдарның көвей кезиин олар алган». 

Кадыкшыл байдалы кызыгаарлыг уругларны хүнде ийи катап чемгерер дээш харыысалгалыг ниити өөредилге организацияларының удуртукчулары ам ону организастаар. 

«Санитар-эпидемиологтуг негелделер езугаар тургускан чурум-биле бадылаан чижек менюну ажыглап, ону организастаар – деп, яамы демдеглээн. – Бажыңында өөренип турар кадыы багай уруглар аъш-чем продуктуларының сүмелээн нормазы база даңзызы езугаар, кургаг чемнерни алыр». 

Кадыы багай уругнуң хоойлу езугаар төлээзи аъш-чем продуктузун алырда, чыл санында школаже билдириишкинни киирер деп, яамы тайылбырлаан.

 “Класс удуртукчу башкылары документерни долдурарын тайылбырлап бээр. Билдириишкин киирикчизи паспорт, төрүттүнген дугайында херечилел, ПМПК түңнели, эмчи комиссиязының түңнел бижии дээн ышкаш документилерни киирер” – деп, ведомство тайылбырны берген.