Тываның Баштыңы чаа неделяның ажыл угланыышкыннарын айыткан

Тываның тускай хөгжүлде программазында планнаттынган шупту объектилерниң күүселдезин чедип алыры чугулазын айыткан.

 «Бир дугаарында, 2021 чылда тудуг объектилерин шапкынчыдар. Чаа тудуг сезону эгелэни-биле, чаа бүдүрүлгелерни ажыдар дээш бүгү күштерни, аргаларны ынаар мөөңнээр. Федералдыг программаларның курлавырларын ажыглап, аңаа киржир дээш бүгү-ле чүүлдерни кылып, чагыгларны дарый киирер херек» - Тываның Баштыңы Шолбан Кара-оол демдеглээн.

 Республиканың шапкын хөгжүлдезиниң тускай программазының сорулгаларын чедип ап, ону калбартыры-биле ынаар чаа объектилерни киирерин, Тываның Баштыңы чугаалаан. Шолбан Кара-оол оон аңгыда, чазактың социал ажыл блогунга элээн каш даалгаларны берген.

 «Сөөлгү хүннерде “Социал керээ” программага киржирин сонуургаан айтырыглар чаңгыс чер-чурттугларывыстан хөй кээп турарын көрүп тур мен. Бо чылын деткимчени 38,5 хуу көвүдедип, 410,4 млн. рубль чедирген бис. 3 муң ажыг өг-бүлелер социал керээ ачы-дузазын алыр - деп, Тываның Баштыңы демдеглээн. – РФ-тиң Чазаа чоокта чаа программаже өскертилгелерни киирген. Ам социал керээ-биле хууда дузалал ажыл-агыйын хөгжүдүп болур апарган. Керээ чарган өг-бүлелер бодунуң дузалал ажыл-агыйын хөгжүдеринге 100 муң рубльди угландырар. Бистиң социал политика яамызынга кыска үе ишитинде эрге-хоойлу актызын бадылап, чаартылгаларга даянып документилерни хүлээр даалганы онаадым». 

Республика девискээринде даг-болбаазырадылга бүдүрүлгелеринче тус черниң специалистерин ажылга тургузарын чедип алыры – адыр яамызының бир чугула айтырыы болур. «Лунсин», Голевтиң даг-руда компаниязы, «Тардан Голд» даг-болбаазырадылга бүдүрүлгелеринде ажылдакчыларның 72,5 хуузу республиканың чурттакчылары, азы 2868 кижи чедип турар деп, Тываның Баштыңы Шолбан Кара-оол демдеглээн. 

«Ону чедип алыр дээш турушкан бис. Компаниялар эгезинде бистиң кижилеривисти ажылче алыксавас, өске регионнардан вахта-биле ажылдап кээр ажылчыннарны хөлезелеп турган. Республиканың чурттакчыларын ажылга хаара тудар кылдыр инвесторларны бүзүредип, олар-биле тускай дугуржулгаларны албан-биле чарган мен. Штаттың эвээш дизе 60 хуузу тус черниң чурттакчылары болур деп, ындыг негелдени салган бис – деп, Тываның Баштыңы сагындырган. – Бөгүнде ол чурум норма апарган. 2868 ажылчын олуттарда кижилер эвээш дизе-ле үш кижини чемгерип турары - республикага чугула. Оон аңгыда бүдүрүлге оон-даа өске ажылдарны берген. Улуг инвестиция төлевилелдеринде хаара туттунган чаңгыс чер чурттугларывыстың санын 10-га көвүдедиптер болзувусса, ында тургустунган ажылчын олуттарда кижи бүрүзүнге дыка ажыктыг».