Тываның Баштыңы арга-арыг өрттеринге база часкы үерлээшкинге удур эки белеткенирин негээн

ТР-ниң Бойдус яамызының дыңнатканы-биле алырга, апрельде хенертен чылып, агаарның температуразы ортумак көргүзүгден элээн бедип, суг үерин база арга-арыг өрттерин болдурар чадавас. Оларны болдурбас хемчеглерни ап чорударын Тываның Чазааның аппарат хуралында чугаалашкан. 

Республика Баштыңы Шолбан Кара-оол арга-арыг чоогунда суурларны долгандыр черни өртке удур чардырар ажылдарны чорударын кожуун чагыргаларының даргаларынга сагындырган. Өртке удур албанның бүгү-ле аргаларын, күштерин өрттерниң өөскүп үнген черлерин баштайгы шактарында өжүреринче угландырар. Өрт айыылын болдурбазы-биле, апрель-май айларда арга-арыгже кирерин хораан дээштиг хемчеглерни алыры чугула деп, Тываның Баштыңы чугаалаан. 

ТР-ниң Бойдус курлавырлары болгаш экология яамызы, тус чер бот-башкарылга органнары сезоннуг кызыгаарлаашкыннарны үезинде киирерин сүмелээн. Үер эгелевээнде эрик кыдыгларын, чалдарны быжыглаарын чагырга даргаларынга дааскан.