Тываның чедери берге суурларын көжүп чоруур ФАП-тар-биле хандырар

Республика найысылалындан эң ырак – Тере-Хөл кожуунга эмчи дузазын чедингир болдурарының дугайында чугааны чоруткан. Чылыг дүжүп, хемнер ажыттынып эгелээн соонда, ыраккы кыштагларда кижилерге эмчи дузазын бөгүн авиация -биле алыр. Кожууннуң суурлар аразында чер оруктап аргыжары дыка берге. Кышкы үеде автомобиль оруу хамаанчок, аът-биле чорууру безин берге апаар. 

«Шагаа бертинде, чедери эң берге Тере-Хөл кожуунче, бөлүк кураторлар эмчилер бригадазы-биле четкен. Бо үеде кыштагларже чүгле вертолет-биле чедип болур. Малчын коданнарга чедип, канчаар чурттап турарын көрүп, дузалажып, оларның дилеглерин дыңнап, Чаа чылдың байыры-биле аъш-чем аймаан дамчытканы, эки болган. Үнүүшкүннүң түңнели-биле кандыг хемчеглер алырын ажылдап кылыр херек. Бирээде, Тере-Хөлде чурттакчы чон эвээш боорда, тарамык чурттап турар. Тайга-даксылда кышкы турлагларже машина хамаанчок, аът-биле чедери берген. Ындыг-даа болза, кижилерге чүнүң-биле дузалажып болурувусту чедип көөр» - деп, Тываның Баштыңы бодунуң блогунда бижээн. 

Кожуунну хайгааралда алган ведомстволар база удуртукчуларның Тере-Хөлдүң малчыннарынга хүнден октаг алыр батареялар комплекизин садып бээр дугайында саналын, ол ышкаш кожуунну республика-биле аргыштырган оруктуң кезиин муниципалдыг өнчүже дамчыдып бээр дээн ТР-ниң Орук-транспорт яамызының айтырыын Шолбан Кара-оол деткээн. 

Тере-Хөл кожуун - Тываның эң ырак болгаш чедери берге кожуунунга санадыр. Кожуун ыраккы Соңгу чүк районунга хамааржыр. Ында 1920 кижи чурттап турар. Кожуун девискээринде Тере-Хөл хөлде ортулукта, VIII чүс чылда туткан Пор-Бажың деп адаар уйгур шивээниң орну-биле сурагжаан.