Тываның Баштыңы Афганистандан шериглерни үндүрген хүннүң дугайында: келир үевистиң быжыг таваа – төрээн чуртунга ынакшылда

Ол дайын-чааже чоруткан оолдарга алдар кылдыр, совет солдаттың маадырлыг чоруунга тураскааткан хемчеглер эрттип турарын демдеглээн.

 «Ол дайынга 12 чаңгыс чер-чурттугларывысты ышкынган бис. Дайынга киришкен 400 ажыг оолдарның чамдыызы дайын шөлүнге алган балыгларындан дараазында чылдарда чок болгулаан. Ажыы-биле чугаалаар болза, олар Ада-чурттуң Улуг дайынынга киришкен хоочуннарга деңнежип турар. Олар аныяк-өскенни өөредип-кижизидер патриотчу ажылга дыка хөйнү берип чоруур. Афганистандан шериглерни үндүрген хүнге тураскааткан хемчеглер ооң-биле улуг ужур-уткалыг». 

Чурттуң президентизи бистиң идеологиявыстың өзээ - аныяктарның, салгалдарның кижизидилгезинде деп, демдеглээнин Тываның Баштыңы Шолбан Кара-оол сагындырган. Ада-чуртка ынакшыл, төрээн чуртка бердиниишкин - келир үевистиң эң кол үндезини ында. Мында чурттап чоруур кижи бүрүзүнүң, биче буурай чоннарның төлээлерин хүндүлеп, аңгы-аңгы нация чоннарның болгаш шажынның чаңгыс демниин кадагалап, камгалаары чугулазын чугаалаан. 

«Төрээн чуртка ынакшыл, патриотчу чорук таварыштыр кижилерни, ылаңгыя аныяк салгалды демнештирип, каттыштырары – бистиң ажыл-чорудулгавыстың өзээ болур» - деп, республика баштыңы чугаалаан. 

Хоочуннарга, ажыл-ишчи кижилерге, улуг салгалга хүндүткелдиг хамаарылга чүс-чүс чылдарда туруп келген езу-чурумнарга өөредилге-биле патриотчу ажыл тургустунар ужурлуг. Патриотчу кижизидилгеде онза черни билдингир кижилерниң болгаш хөй-ниити организацияларының инициативалары ээлээр деп, Шолбан Кара-оол айыткан.

Афганистандан шериглерни үндүргениниң 32 чылынга тураскааткан байырлыг хемчеглер эртип турарын сагындыраал.