Бии-Хем кожууннуң Суш суурда чаартынган культура одаа ажыттынган

1970 чылда туттунган эрги оран-саваны "Культура" национал төлевилелдиң ачызында септеп-селээн. Оран-саваның даштын, соңга-хаалгазын, кырын, одалга база чырык системазын бүрүнү-биле солуп, иштики, дашкыкы улуг ажылдарын кылган. Септелге соонда ол ам таныттынмас кылдыр чаарттынган. 

Тыва Республиканың культура сайыды Алдар Тамдын, Тыва Республиканың Дээди Хуралының (парламент) депутады Аяна Монгуш, Бии-Хем кожуун чагыргазының даргазы Кудер Монгуш, Бии-Хем кожуун чагыргазының аныяктар херээ, спорт болгаш культура килдизиниң начальниги Ф. А. Анганзоров база кожууннуң Адалар чөвүлелиниң даргазы В. Д. Маады, Суш суурнуң культура ажылдакчылары, активи база чурттакчылары байырлыг хемчегге киришкен.

Культура одааның ажыттынганы-биле чыылганнарга байырны культура сайыды чедирген. Капитал септелге чорудар акша-хөреңгини аңгылап бергени дээш чурттуң болгаш республиканың удуртулгазынга, үре-түңнелдиг кады ажылдажылга дээш кожууннуң, сумунуң удуртукчуларынга база культура ажылдакчыларынга өөрүп четтиргенин илереткен. 

Суурнуң чурттакчылары чаартынган культура одаанга сеткили өөрүп амырааннар.