Тываның Чазаа шаңнал акшаларын республиканың бюджет ажылдакчыларынга дээш берипкен

Россияның күүсекчи эрге-чагыргазының регион органнарының ортузунга эки көргүзүглерлиг болганы дээш Тываның Чазаанда 99,9 млн. рубль хемчээлдиг грант акшазы келгенин Шолбан Кара-оол дыңнаткан. 

«Карак-кызыл чорук база күш-ажыл кезээде үре-түңнелди бээр – деп, Шолбан Кара-оол чугаалаан. – Бо чылын халдавырга удур демиселде бүгү-ле сорулгаларын күүседип, социал харыысалгаларывысты боттандырып, чылдың тудуг программаларын кылып, национал болгаш күрүне программалары дээш шудургу ажылдаан бис». 

Республика Чазаа эки ажылдаанын Москва демдеглээн деп, Тываның Баштыңы айыткан. «Бо чылын регионнуң күүсекчи эрге-чагырга органнары эки көргүзүглерлиг ажыл-чорудулганы чедип ап, Россияның субъектилериниң башкарыкчы командалар санынче кирген – деп, Шолбан Кара-оол дыңнаткан. – Ол дээш премия кылдыр ажыглаарынга 99,9 млн. рубль грант акшазы келген». 

Республиканың удуртукчузу алганы грантының шуптузун республиканың бюджет адырының ажылдакчыларынга декабрь айның шалың акшазынче үндүрер деп шиитпирлээн. «Шын шиитпир хүлээп алдынган. Санаашкыннарны кылган, республиканың албан черлери база тус чер бюджеттери немелде акшаландырыышкынны алыр” - деп, Шолбан Кара-оол чугаалаан.