Тываның Баштыңы Москвага сургакчылаашкындан ээп чанып келген

Албан ажыл үезинде Россияның Чазааның даргазының оралакчызы Александр Новак-биле регионнуң удуртукчузу Шолбан Кара-оол ужурашкаш, республикада чырык өртээн чиигедириниң айтырыын, а энергетика сайыды Николай Шульгинов-биле Ак-Суг чыдынындан чырык четкизиниң ажыл-агыйын кедизинде уламчылаар планны сайгарган.

Приморьениң губернатору Олег Кожемяко-биле база ужуражып, республиканың регионнар аразының кады ажылдажылга дугайында сайгарылганы чоруткан. 

“Кожавыс Хакасияга деңнээрге чырык өртээ бисте оон бүдүн чартык катап улуу дыка шын эвес деп санаар мен – деп, Тываның Баштыңы Шолбан Кара-оол Россия Чазааның Даргазының оралакчызы Александр Новак-биле чугаалажып олура демдеглээн. – Саян-Шушенск ГЭС-тиң сугга алыскан чери бистиң республикада». 

Амгы үеде Голевтиң даг-руда компаниязынга Иркутскунуң энергосистемазы-биле тудуп турар чырык шугумун көскү чижек кылдыр Тываның Баштыңы таныштырган. «Бистиң чагыывыска үндезилээш, ол электри четкизиниң ажыл-агыйынга субсидияны берип турар. Ооң-биле чергелештир, Приангарье биле Тывада тарифтер чеди катап ылгалдыг” – деп, Шолбан Кара-оол айыткан. 

Тываның Баштыңы ындыг чүүл шын эвес деп демдеглээн. Амгы үеде чурттуң удуртулгазы ол айтырыгны контрольда алганын чугаалаан. 

«Регионнарда экономиканың аңгы-аңгы болганындан, ында чурттап турар чурттакчы чоннуң чаагай чоруу дыка хамаарылгалыг болуру шын эвес – деп, Шолбан Кара-оол санаан. – Бистиң республика база үлетпүрнү хөгжүдүп болур, ындыг болганда чырык өртээ таарымчалыг болур ужурлуг. Ылаңгыя чурттакчы чонга». 

Тываның Баштыңы Тожу кожуунда казымак байлак чыдынын шиңгээдип турар Голевтиң даг-руда компаниязы тус черже чырыкты шөйериниң айтырыын Россияның энергетика сайыды Николай Шульгинов-биле чугаалажып көрген.

 «Тываның социал-экономиктиг хөгжүлдезиниң тускай планы ажылдап турар – деп, Шолбан Кара-оол чугаалаан. – Россияның Чазаандан дорт деткимчени алган бис, ында республиканың шупту кожууннарын чырык-биле хандырарын дорт бижээн». 

Москва хоорайда ажылчын сургакчылаашкында келген Приморье крайның удуртукчузу Олег Кожемяко-биле Тываның Баштыңы база ужурашкан. «Коллегалар-биле ужуражыры солун боор чүве – деп, Шолбан Кара-оол бодунуң блогунда бижэн. – Тыва биле Приморье аразы муң-муң километр болзажок, дөмей чүүлдеривис хөй. Ындыг чүүлдерни ажыы-биле чугаалап турар бис. Приморьеде балык рыногун тургузар планны кайда-даа чугаалаап турар болза, а бис – агроүлетпүр база индустриалдыг парктарны тудуп эгелээн бис». 

Регионнарның экономиказын хөгжүдеринге идиг бээр аргаларны чугаалажып көргенин Тываның Баштыңы чугаалаан. «Куруг черден үнүш ажыл-агыйын канчаар шимчедипкенивисти, тыва хүрең-тарааны тарып эгелээнивисти Олег Николаевичиге чугааладым. Эксперттер тарааның бедик шынарлыын демдеглээн. Приморье-биле кожа чыдар Япония ону сонуургап турар» – деп, Шолбан Кара-оол чугаалаан.