"Кадык камгалалы" национал төлевилел: Тываның онкология албанының лабораториязын чаа дериг-херекселдер-биле бүрүн четчелээн

”Кадык камгалалы” национал төлевилел база “Ыжык аарыглары-биле демисел” регион төлевилелиниң боттаныышкыны-биле республиканың онкология диспансериниң лабораториязының материал-техниктиг баазазын быжыглаан: ”Кадык камгалалы” национал төлевилели-биле чеди амгы үениң лаборатория дериг-херекселдерин база республика бюджединиң акша-хөреңгизи-биле ийи аппаратты садып салган. Бо хүнде гистология лабораториязында эргижирээнинден солуур хире лаборатория техниказы чок. 

Сканер, фотоаппарат база монитор-биле дериттинген кезиишкин материалдарын алыр столду тургузары-биле инженер бо хүнде чедип кээр. NX Thermo Scientific фирманың N525 криостат аппарады ажылдап турар. Аарыг кижи наркоз адаанга чыдырда-ла, кезиишкин үезинде, 15 минута иштинде ылаптыг шын шинчилгени чорудуп, улаштыр канчаар эмнээринге улуг салдарны бээр.  

Thermo Fisher Scientific Gemini AS мультистейнер эмнерни өңнептер шынарлыг. Ооң мурнунда ол ажылды лаборантылар ону савадан саваже хол-биле кудуп турган. Аппарат сенсорлуг башкарылгалыг, чырык өже берзе, аккумулятордан ажылдаар. Оон аңгыда гистология препараттарын чорудар аппарат, криостат микроскову, парафин кудар модульдуг система дээш, өске-даа эмчи дериг-херекселдерин алган. Эрткен чылдың төнчүзүнде, профессорлардан чугула арга-сүме алырынга телемедицина харылзаазынга херек сканерлээр микроскопту база салган турган. Биохимия лабораториязында TS-60 автоматчыткан коагулятор келген. 

Ол бүгү дериг-херекселдерни чаартыр септеп-селээн өрээлдерде эптээн. Лаборатория албанынга өрээлдер немээри-биле, хеп чуур черниң ажылын өскээр дамчыткан. Санитарлыг бүгү негелделерге дүүштүр, аарыг кижилерге эптиг болур кылдыр, лабораторияже кирер эжикти тускайлаан.