Кызылдың солагай талакы дачаларында херээженнер консультациязының дөрт участогун ажыткан

 Чаа оран-саваны аңгы котельная одап турар. Кардиотокография (КТГ), сыкыртыр, шинчиир өрээлдер, регистратура, келген кижилерге база ажылдакчыларга санитарлыг арыглал черлери бар. Кадык камгалал яамызының тускайлап бергени девискээринде оран-сава 100 дөрбелчин метр ниити шөлдүг. Херээженнер консультациязынга дөрт акушер-гинеколог, дөрт акушерка, сыкыртыр эмчи сестразы, КТГ кабинединиң акушерказы база бүрүткекчи ажылдаар. 

Тыва Республиканың кадык камгалал сайыдының оралакчызы Алла Намдак солагай талакы дачаларның чуртакчыларынга байырны чедирген. Кызылдың ол кезээнде 8845 херээжен чон чурттап турарын, РФ-тиң кадык камгалал яамызының дужаалы-биле бир акушер-гинекологтуг участокка 2200 херээжен быжыглаттынар ужурлуг болгаш, бо бажыңда дөрт участок дачаның херээжен чонун ийи ээлчегге хүлээп ажылдаарын дыңнаткан. Иелер хүнүнүң бүдүүзүнде дача ниитилелиниң херээжен чурттакчыларынга онзагай болуушкун болганын Алла Намдак демдеглээн. 

Бо херээженнер консультациязының участоктарын быжыглаан ТР-ниң Перинатальдыг төвүнүң кол эмчизи Мочурга Бадарчы ук хемчегге киришкеш, чурттап турар чериниң аайы-биле эмчи дузазын алыр аргалыг апарганы дээш, херээжен чонга байырны чедирген. Херээженнер консультациязы ол-ла хүн ажылын эгелээн.