Эң-не кызымак кыштагжы малчыннарга хүнден октаар электростанцияларны берген

 Губернатор төлевилелиниң 2018 чылдың 50 шылгараңгай киржикчилерин чырык-биле хандырар дээш, 2020 чылда республика бюджединден 3,5 млн. рубль акшаны үндүрген. «Инновастыг технологиялар» КХН-биле 50 киржикчи керээлерни чарган. 

Чөөн-Хемчик кожууннуң Шеми сумузундан Назыты Аяна Кушкаш-ооловна 2 чыл дургузунда малдың 370 баш чаш төлүн камгалап алган. А Бай-Тайга кожууннуң Хемчик сумузундан Донгак Буян Алексеевич 398 башты немей алган. Мөңгүн-Тайганың Каргыдан Хертек Менги Маадыровичиниң малы 2 чыл иштинде 400 башка өзүп-көвүдээн. 

Хүнден октаг алыр бир комплект электростанцияның өртээ 77 778 рубль, ооң 70 000 рублин республика бюджединден субсидия кылдыр үндүрер болза, а 7778 рублин (10 %) – киржикчи боду төлежир. 

Электростанция комплектизинде: 150 Ватт күчүлүг 2 кезек хүн панели; 600 Ватт күчүлүг 1 инвертор, 30А ММРТ 1 хүн контроллеру, 1 кезек 150 А*ч аккумлятор, коннекторлар, автоматчыткан өжүрер чүүл, удазыннар кирген щит бар.