Тываның Баштыңы Шолбан Кара-оол коронавирусту нептеретпес дээш кылыр кол хемчеглерни сагындырган

Тываның Баштыңы ТР-ниң Кадык камгалал яамызындан ковид-19-биле аараан кижилерге халас эм хандырылгазының тодаргай чурумун тургузарын негээн. Чазак ол сорулгага 12 млн. рубльди тускайлаан. Эмчи комиссиязы эмнерни алыр кижилерниң даңзызын хевирлээр ужурлуг. Хоочураан аарыгларлыг, хөй ажы-төлдүг болгаш ажылдавайн турар пенсионерлер халас эмнерни алыр эргелиг. 

Шолбан Кара-оол коронавируска тестини хынаарын база шинчилелдиң түңнелин дүрген бээрин чедип алыры чугула деп негээн. Аарыгдан чок болганының чылдагаанын тодарадыр, ооң артында ол кижиниң өг-бүлези, ажы-төлү бар деп демдеглээн. 

Чаа өөредилге улдуңу эгелээни-биле, школаларда профилактика хемчеглерин күштелдирер херек деп, республика баштыңы сагындырган. ТР-ниң Өөредилге яамызы Кадык камгалал яамызы биле Росөөредилге хайгааралының айтыышкыннарын сагып, таарыштырган часпарларны ажыглаар деп шиитпирлээн. 

Күскү дыштанылга хүннеринде “Айыыл чок дыштанылга”, “Арыг холдар”, “Бажыңда мен” акцияларны эрттирген. Ол ышкаш чедимче чок өг-бүлеледе база малчын аалдарда ажы-төлдерни хынаан үнүүшкүннүг хемчеглерни организастаан. 

«Далаш шиитпирлер үндүрүп, школаларны хагган ажыы чок. Халдавырны таратпас хемчеглерни алыр херек. Школа назыны четпээн албан черлери ада-иелерге ажылдап, акша-шалыңын бажыңынче эккээр арганы бээр ужурлуг. Аңаа идиг болур таарымчалыг аргалардан тывыңар» - деп, Тываның Баштыңы негээн.