Тываның Баштыңы удуртукчуларның кичээнгейин бюджет чорудуунче угландырган
29.09.2020
«Ам 2021 чылдың бюджедин хевирлээрининиң үези чоруп турар. Кижилерниң амыдыралчы чугула херек шупту айтырыгларын көрүп, чаңгыс чер-чурттугларывыска эң ажыктыг объектилер база хемчеглер дээш акша-хөреңгини салып алыр ужурлуг бис» - деп, Тываның Баштыңы Шолбан Кара-оол понедельникте аппарат хуралында чугаалаан.
Экономиктиг долу базымче кирерин чедип алыр амыр эвес айтырыг мурнувуста туруп турар деп ол демдеглээн: «Ону чедип алырынга дээштиг арга – Тываның шапкын хөгжүлдезиниң бот-тускайлаң планы бисте бар. Бо чылын программаны кайы хире боттандырып алырывыстан, дараазында чылда акшаландырыышкынның хемчээли хамааржыр. Бүгү-ле күрүне программаларынга хөйү-биле киржип, федералдыг органнарда чагыгларывысты камгалаары – бөгүнде кылыр ужурлуг кол айтырыывыс ол. Күрүнениң-даа, хуу-даа инвестицияларны хаара тудуп алыр дээш эң-не идепкейлиг болур херек. Инвестиция секторунда чедиишкиннерден яамылар болгаш ведомстволар удуртукчуларының ажылының шынары көскү болур».
Возврат к списку
|