Тываның Баштыңы коронавируска удур тайылбыр ажылын күштелдирерин негээн

Халдавырлыг аарыглар эмнелгези долган, республиканың кадык камгалал яамызы оруннарны немей салып эгелээн. «Экономика-биле кижиниң кадыының үнезинге хамаарыштыр дээштиг ажылдың шугумун тургузар” – деп, Тываның баштыңы чугаалаан. 

Шыңгыы карантин кымга-даа ажыктыг эвес болгаш, ол ажылдавас-даа, деп ол демдеглээн. Ынчап кээрге, кижи бүрүзү бодунуң кадыы дээш харыысалгалыын медереп билир ужурлуг. «Маска, дезинфекция, социал дистанция – кол камгалакчылар ол. Кандыг-даа организацияның удуртукчузу бодунуң коллективинче халдавырны киирбес дээш шыңгыы профилактиктиг хемчеглерни алыр» - деп, Шолбан Кара-оол чугаалаан. 

Информатизация болгаш харылзаа яамызынга тайылбыр ажылын күштелдирерин онааган. Коронавирустуң бирги чалгыында демиселдиң эки арга-дуржулгазынга даянып, эрткен бергедээшкиннерден кичээлдерни үндүрер. Республикаже кирер оруктарга хыналда доскуулдар, дүрген эмчи дузазының база поликлиникаларның шалыпкын ажылы, колл-төптерниң чедиргири, COVID-19-ка тестирование база анализтерниң түңнелин үезинде бээри дээш оон-даа өске. Оперштабка ажыл-чорудулганы мөөңнээриниң планын тургузарын дааскан.