Елена Каратаева: кызыгаарлаттынган хемчеглерни сагып турарынга контроль күштелир

Ынчангаш Тыва Республиканың АЧдК 3.18 чүүлүнде көрдүнген административтиг чурум үрээшкиннериниң дугайында протоколдарны долдурар бүрүн эргелиг күүсекчи эрге-чагырга органнарының албан-хаакчыларындан рейд бөлүүн тургускан. 

«Бир эвес бүдүрүлгелерниң удуртукчулары санитар-эпидемиологтуг дүрүмнерниң негелделерин сагывас болза, албан-хаакчы кижилер Тываның АЧдК 3.18 чүүлү-биле, хууда сайгарлыкчыга азы юридиктиг черге – протокол долдуртунуп турар кижиге онааштыр сагындырыг азы 300 муң рубль чедир торгаал көрдүнген протоколду, хоругну бижип болур. Торгаалдың түңнери улуг, ынчангаш кижи бүрүзү санэпидрегламентиниң негелделерин сагааны дээре» - деп, Елена Каратаева дыңнаткан. 

Тываның экономика сайыды Тыва Республиканың Чазааның 2020 чылдың май 15-те №213 доктаалы ам-даа күштүг, ында тускай айтыышкын үнгүжеге чамдык черлерниң ажыл-чорудулгазын түр үеде соксатканын сагындырган:  

- чоннуң киржилгези-биле эртер көдээ ажыл-агый ярмаркаларын, дыштанылга, хөглээшкинниг, көрүлделиг, культурлуг, күш-культуржу, спортчу, делгелгелиг, чырыдыышкынныг, рекламалыг болгаш өске-даа хемчеглерни, база ол ышкаш кижилер хөй баар черлерни, кежээки клубтар (дискотекалар) база ындыг хевирлиг объектилер, кинотеатрлар (кинозаладар), уруглар ойнаар черлер, төптер болгаш хөглээр өске-даа черлерниң; 

- рестораннар, кафе, столоваялар, буфеттер, барлар, хөй-ниитиниң чемненилге черлериниң;  

- үүрмек садыглаашкын объектилери, садыг төптери, садыг комплекстери, садыг-хөглээшкин төптериниң; 

- чараштаныр салоннар, косметиктиг салоннар, СПА-салоннар, массаж салоннары, солярийлер, банялар, сауналар болгаш ындыг хевирлиг ачы-дуза чедирип турар өске-даа объектилерниң; 

- бөлгүмнер болгаш секциялар, библиотека албан черлери, чурттакчы чонга социал хандырылга төптеринде дыштанылга хемчеглерин;  

- стоматологтуң дүрген болгаш соңгаарладып болбас ачы-дузазы негеттинип турар байдалдыг база аргажок аараандан аңгыда, стоматология ачы-дузазын;  

- Тыва Республиканың девискээринде күрүне ачы-дузазы чедирер хөй талалыг ажыл-чорудулгалыг төптерге баш бурунгаар бижиткен хамаатыларга ачы-дуза чедиреринден аңгыда, күрүне болгаш өске-даа ачы-дуза чедирилгезин чорударын.  

Елена Каратаева Роспотребнадзорнуң сүмелээни үш көргүзүгнүң шуптузун күүседиптер болза, карантинни кошкадырының бирги чадазынче кирип болурун дыңнаткан: 

бирээде – инфекцияның тарап-нептерээниниң коэффициентизи 1-ден ашпас ужурлуг; 

ийиги көргүзүг – COVID-19 аарыг кижилерге тускайлаан хостуг оруннарның бары 50 % эвээжевес, 

үште – 100 муң чурттакчыга онааштыр тестирование 70 % кудулавас. 

«Кажан ол көргүзүглерни чедип алыр болзувусса, чүгле ынчан чамдык организацияларның ажылын катап эгелеп, хөй-ниити черлеринге: скверлер, парктар болгаш өске-даа черлерге агаарлаар дугайында чугаалап болур бис. Бирги үе-чадада эмчи маскаларын, хол-хаптарын кедери, социал дистанцияны сагыыры, холдарны, хөй кижилер чыглыр өрээлдерни дезинфекциялаары албан дээрзин демдеглезе чогуур» - деп, Тываның экономика сайыды Елена Каратаева чугаалаан. 

Понедельникте, аппарат хуралында, Тыва Республиканың Баштыңы Шолбан Кара-оол корум-чурум камгалакчыларындан болгаш эрге-чагырганың өске-даа субъектилеринден пандемия үезинде республика девискээринде амгы кызыгаарлаттынган хемчеглерни сагып турарынга контрольду күштелдирерин негээнин сагындыраал.