Тываның Баштыңы: бергелерни ажып эрте бээр бис

Бүгү-ле эмнээшкиннерни эмчилерниң хайгааралы-биле ап турар. Ниити байдалы анаа.

Республика Баштыңы бодунуң оралакчыларынга бирги ээлчегде кылыр ажылдарны хувааган.

Бодунуң албан хүлээлгезин бирги оралакчызы Александр Брокертке хүлээндирзе-даа, боду дорт харылзаага арттып, байдалды ырактан башкарып удуртур. 

«Хүндүлүг чаңгыс чер-чурттуглар, кончуг дүрген тарап нептерээр халдавырлыг аарыг-дыр деп чугаалаайн. Дөрт-ле хонук дургузунда кижиниң байдалы баксырып, шаг чок апаар-дыр. Камнанып, камгаланып көрүңер. Хөй кижилер чыылган черлерже баарын аргалыг болза шеглеңер. Эң кол сагыыр чүүл ол. Арыг-силигни сагып, холуңарны чуп туруңар. Аргалыг болза бажың иштин, ажылдаар өрээлдерни дезинфекциялаар. Бергелерни шупту ажып эрте бээр бис. Республикада байдал ажырбас. Дөмей-ле бо үе эрте бээр, шупту чаңгыс күш бооп бо үени эрттип алыр бис. Бодуңарны эки камнаңар, чүгле экини күзедим».