Сергей Шойгунуң белекке чоруткан камгалал херекселдерин Тываның эмнелге албан черлеринге үлээн

Россияның Маадыры Сергей Шойгу эштери-биле кады төрээн Тывазынче 825 улуг саазын хаптарда хууда камгалал херекселдерин саткаш, ачы-дуза кылдыр белекке чоруткан. Ол комплектилерде камгалал комбинезоннар, арын дуглаар экраннар, маскалар, бөрттер, костюмнар, антисептиктер, лабораторлуг тест-системалар база эмнер аймаа бар. 

Чаа коронавирус-биле демисел ажылында хаара туттунган эмчилер, эмчи сестралары, эмнелгелерниң ажылдакчылар ол бүгүнү алыр. 

Шойгунуң ооң мурнунда чоруткан “посылказы”-биле, бо чоруткан хууда камгалал херекселдериниң курлавыры ам үш ай иштинде чедер деп, республиканың Кадык камгалал яамызы дыңнаткан.

Республика Баштыңы Шолбан Кара-оол ховар бо чүүлдерни чүгле онза айыылдыг зонада ажылдап турар кижилерни хандырар кылдыр чөптүг ажыглаарынче эмнелге организацияларының удуртукчуларын кыйгырган. 

Шойгудан белектерни Мөңгүн-Тайга, Эрзин, Таңды база Бии-Хем кожууннарның эмнелгелери бир дугаарында алганнар. Өске кожууннар эпидемиологтуг байдал аайы-биле, эмнерни база ХКЭ-лерни алыр. Сovid-19 диагнозтуг аарыг кижилерни хүлээр кылдыр тускайлаттынган ийи эмнелгениң ажылдакчыларынга ол белектиң хөй кезиин дамчыдар. 

Чумага удур азы хөй катап ажыглаар костюмнарга бодаарга, Шойгунуң чорудупкан костюмнары ажылдаарынга эптиг-дир дээрзин, эмчилер демдеглээн. Комбинезоннарның материалдары тускай технология-биле кылган болгаш, камгалалы бүзүрелдиг, “тынып” турар. 

«Тываның төлептиг оглу Сергей Кужугетович – бистиң чоргааралывыс. Хөйге-чарга чарлаттынып турбайн, кезээде бистерге дузалажып чоруур. Ынчангаш эң-не өөрүнчүг болгаш чөленгииш бооп чоруур ооң деткиишкинин чугаалаар ужурлуг бис. Чаңгыс чер-чурттуувус кандыг-даа берге үелерде бистиң-биле кады болуп, күштү берип чоруур!» - деп, Шолбан Кара-оол бодунуң блогунда бижээн.

Республиканың эмнелге албан черлериниң удуртукчулары өөрүшкүзүн чажырбаан. Республиканың 1 дугаар эмнелгезиниң кол эмчизи Вячеслав Ховалыг коронавирустуг бо үеде эң херек чүүлдерни эмчилер алганын демдеглээн. Халдавырлыг аарыглар эмнелгезиниң кол эмчизи Анна Сарыглар инфекционист эмчилерниң, эмчи сестраларының база санитарларның өмүнээзинден четтиргенин илереткен. 

Сергей Шойгу-биле кезээде харылзажып чоруур Тываның баштыңы Шолбан Кара-оол эвес болза, мындыг белек-даа турбас турган боор деп, «Ресфармация» КБА-ның директору Чойган Докпер-оол демдеглээн. 

«Республика Баштыңы Шолбан Кара-оолдуң эмчи ажылдакчыларын камгалаңар деп бистен негеп-ле турары дээш, улуу-биле четтирдивис. Ам Улуг Тиилелгениң хүнүнде COVID-19-ту тиилеп алыр боор бис, ол чыскаалды Сергей Кужугетович башкарар» – деп, уругларның катап эмнээшкин болгаш реабилитация төвүнүң улуг эмчизи Аркадий Начин чугаалаан.