Сергей Шойгунуң чорудуп берген эмчи маскаларын, антисептиктерни, экспресс-тестилерни Тываның эмчилеринге дамчыткан
21.04.2020
Россияның камгалал сайыды Сергей Шойгу чаа коронавирус-биле демисежир кылдыр, Тыва Республиканың халдавырлыг аарыглар эмнелгелеринче 217500 санныг чаңгыс катап ажыглаар эмчи маскаларын, савалыг 200 антисептикти база 500 экспресс-тестилерни белекке чоруткан.
COVID-19-тан аараан деп лабораторияга бадыткаттынган аарыг кижилер-биле чоок ажылдыг эмчи ажылдакчыларын доктаамал хынаарынга ол экспресс-тестилерни ажыглаар.
«Бистиң Сергей Кужугетовичиден эки медээ келди. Элээн каш чүс муң маскаларны, хуу камгалалдың өске чүүлдерин бодунуң акшазы-биле саткаш, Тываже чорудупканын ол дыңнатты. Мындыг чүүлдер кижиниң сеткил-хөөнүн көдүрүптер-дир. А кажан сагыш-сеткилге чиик турда, иммунитет-даа быжыг болур дээрзинге чөпшээрежир боор силер. Бот-аңгыланыр чурумда чүгле бистер эвес бис. Бистиң Улуг чаңгыс чер-чурттуувустан, Россияның Чазаандан, кожалардан, кайыын-даа дузалар кээп тур» - деп, Тываның Баштыңы Шолбан Кара-оол соцчеткиде бодунуң бижикчилеринге дыңнаткан.
Эмчи ажылдакчылары база халдавырлыг аарыглар эмнелгезинде аарыг кижилер маскаларны ажыглаар.
Республиканың 1 дугаар эмнелгезиниң терапия корпузунда база республиканың халдавырлыг аарыглар эмнелгезинде чаа коронавирус аарыг кижилерни эмнээринге 327 тускай эмчи оруннарын белеткээнин сагындыраал.
Амгы үеде Кызылдың халдавырлыг аарыглар эмнелгезинде COVID-19 аарыглыг деп лабораторияга бадыткаттынган чеди кижи чыдар. Тожу кожуунда инфекциялыг сес кижи эмчилерниң хайгааралында.
Возврат к списку
|