Тываның Баштыңы республикада коронавирустан аараан ийи таварылганы дыңнаткан

Тываның Баштыңы Шолбан Кара-оол ооң дугайында журналистерге дыңнаткан: 

«Хүндүлүг чаңгыс чер-чурттугларым, дүвүренчиг медээни силер-биле үлежикседим. Понедельникте Москвадан 79 бистиң чаңгыс чер-чурттугларывыс ужуп келгенин дыңнаан боор силер. Олар Москвада база улуг хоорайларда чурттап чоруур чаңгыс чер-чурттугларывыс-тыр. Үе бергедеп кээрге, кандыг-даа кижи төрээн черинче чүткүүр. Өске регионнардан чанып кээп турар чаңгыс чер-чурттугларывыска эжиктерни хаап шыдавас бис. Олар дээрге бистиң ажы-төлүвүс, студентилеривис-тир. 

Ужуп келген 79 кижиниң аразында ийи иешки – 35 харлыг авазы биле 5 харлыг оглу аарыг болганы илереттинген. Москвага-ла аарып турган иешкилерни эмнелгеде чыттырган. Апрель 13-те "Москва-Кызыл" рейизинге олар-биле кады ужуп чедип келген арткан пассажир-биле чогуур ажылдар чоруп турар. Оларны бот-тускайланыр чурумче киирген, он дөрт хонук эрткенде анализтерин катап алыр. 

«Шивилигде», «Акта» база аэропортта кээп турарларга термометрияны эрттиргеш, адын-сынын, телефонун тодарадып тура. Хан, думчук анализтерин ап, хынаар лабораторияже чорудар. Эпидемиологтуг байдалы дүшкүүрлүг регионнардан кээп турарларга он дөрт хонуктуң карантинин сагыыр дугайында кол санитар эмчиниң доктаалын тутсуп, холунуң үжүүн ап турар. Ооң соонда автобус-биле бажыңнарынга чедирер. Бот-аңгыланыр чурумну сагып, хөй кижилер чыылган черлерден ойлап чоруңар. Хол тутчуп, мендилежири айыылдыг дээрзин билип алыры артык эвес. Бажың ажылдарын кылып, огород-биле тутчуп турганы дээре. Бот-аңгыланыр чурумну шыңгыы сагып, бодуңарның база чоок кижилериңерниң кадыын камнаңар». 

Беш харлыг оолдуг аныяк иени республиканың халдавырлыг аарыглар эмнелгезинде чыттырган. Иениң шаа чок, кургаг чөдүлдүг, эъдиниң изии 36,6 t0. А оглунуң ишти аарып турар, байдалы эки, чем чиир хөөнү ажырбас. Этиотроптуг эмнээшкин эгелээн. 

Аарыг кижилерни аңгы бокста чыттыргаш, доктаамал хайгааралда алган. Эмчилер бир хүннеп дежурныйлавышаан, эмнелгеде тускайлаан общежитиеде чурттап турар. Тыва Республиканың Баштыңы Шолбан Кара-оолдуң даалгазы-биле Тыва Республиканың Кадык камгалал яамызының ведомство организацияларын республикаже агаар транспорту-биле кээп турар шупту пассажирлерден лабораторлуг анализтер алырынче хаара туткан. Дөрт лабораторияда – СПИД төвүнде, республиканың кеш диспансеринде, халдавырлыг аарыглар эмнелгезинде база ТР-ниң гигиена болгаш эпидемиология төвүнде шинчилелдерни чорудуп турар. Ак база Шивилиг автомобиль постуларында биологтуг материалдар алырын эгелээн. Республикаже халдавыр эккелген ийи болуушкунну илереткени-биле, ооң өөскүүрүн чок кылыр ажылдар эгелээн. 

Айыылдыг халдавырның пандемия үезинде кижи бүрүзү арыг-шеверни сагып – саваң-биле холдарын чуп, дезинфекциялап, камгалал масканы кедерин кадык камгалал яамызы сагындырып тур. Масканы 2-3 шак болгаш-ла солуур. Хөй катап ажыглаар маскаларны чуггаш, изиг илиир-биле базар. Масканы ужулган соонда, ийи дугаар катап кетпес. 

Холдар-биле арын-башты, карактарны дегбес. Холунда балыг бар болза, латекс хол-хаптарны кедер. Өске кижилер-биле харылзашпайн, бажыңга олурары – халдавырдан камгаланыр эң эптиг арга ол дээрзин сактып алыңар! 

Чаңгыс самолет-биле ужуп келген шупту пассажирлер ам 11 хонгаш, анализин катап дужаар.

Тожунуң Ырбанда чаа коронавирустан аараан 6 кижи барын лаборатория бадыткаанын сагындыраал. Апрель 15-тиң хүнүнде Тывада COVID-19-туг сес таварылга бүрүткеттинген: РФ-тиң Кадык камгалал яамызының бадылаан сүмелери езугаар, беш кижини бажыңында хайгаарап турар болза, бир кижини Тожунуң төп кожуун эмнелгезинде чыттырган. База ол ышкаш ийи кижини республиканың халдавырлыг аарыглар эмнелгезинде чыттырып, аңгылаан.