Тывада аэропорттуң делегей чергелиг кезээн дерииринге 150 млн. рубль көрдүнген

Тываның Чазаа республиканың кол аэропортунда делегей секторун 2020 чылда ажылдадыр планныг. 

Тываның Баштыңы Шолбан Кара-оол «Россия 24» телеканалга интервью берип тургаш, ону чугаалаан. Күрүне кызыгаары, каайлы постузу болгаш делегей чергелиг секторнуң өске-даа албаннары катчы берген белдир пунктунуң чаагайжыдылгазынче федералдыг болгаш регион бюджеттеринден 150 млн. рубльди хаара тудары көрдүнген. 

«Чазак тодаргай стандарттарны негеп турар. Кызыгааржыларга кижини таныттырарының болгаш паспорттарны хынаарының, биометриктиг хыналданы чорударының автоматчыткан системазы турар ужурлуг, ол дээрге эвээш дизе-ле 50 хире млн. рубль болур. Каайлы албанының, Росхереглелхайгааралының, санитар-эпидемиологтуг станцияның ажыл-чорудулгазын хандырар техниктиг дериг-херекселдер база херек. Пассажир кижиниң мага-бодунуң температуразын ырактан хынаар чүгле чаңгыс тепловизорнуң өртээ 8 хире миллион рубль» - деп, Шолбан Кара-оол тайылбырлаан. 

Үш чыл бурунгаар Кызылдың аэропортунуң ужудуп-хондурар шөлүн эде чаарткан соонда, 2019 чылдың августа ол делегей чергелиг деп эрге-байдалды алганын сагындыраал. Чаартылга ажылдарының соонда ужудуп-хондурар шөлдүң хемчээли ийи катап узап, кандыг-даа хевирниң агаар судноларын хүлээп алыр аргалыг апарган. Кожа Моолдуң компаниязы Тыва-биле авиа-аргыжылгага сонуургалдыын илередип, эрткен чылдан бээр Кызыл биле Улан-Батор аразынга тускай керээлиг рейстерни ужударынга белеткелди чорудуп турар.