Фронтучу Георгий Абросимов дайын хоочуннарының тураскаалдарын канчаар экижидерин Тываның культура сайыдынга саналдаан

Георгий Васильевич тураскаалдыг чамдык черлерниң аян-шинчизи шоолуг эвес дээрзин Тываның Баштыңынга дыңнаткан.  

Совет Эвилелиниң Маадыры Хомушку Намгаевич Чургуй-оол аттыг кудумчуда аскан мемориалдыг самбыраның хевири таарымча чок дээрзин культура сайыдынга ол чугаалаан. Ында боодал чечектер салыр чер чок. Совет Эвилелиниң маадырынга тураскаалды эрткен-дүшкен машиналарга-даа, республиканың чурттакчыларынга-даа, кижи бүрүзүнге-даа көскү кылдыр, Чургуй-оол биле Дружба кудумчуларның белдиринде, АТП бүдүрүлгезиниң азыында черге тургузарын Георгий Васильевич  сүмелээн. Культура сайыды Кызыл хоорай мэриязы-биле ол айтырыгны чугаалажып көөрүн аазаан. 

Оон улаштыр сайыт биле хоочун В.М. Халилов аттыг Тываның күрүне филармониязының турар чери Щетинкин-Кравченко кудумчузунга четкен. Георгий Васильевич филармонияның адын бижээн үжүктерге таарзынмаан, кажан Алдар Констанович албан чериниң адын долузу-биле номчуп бээрге, аңаа сеткил ханып, чөпшээрешкен. 

Ада-чурттуң Улуг дайынының хоочуну Георгий Васильевич Абросимов Май 9-та – Тиилелге хүнүнде Москва хоорайга болур Тиилелгениң Парадынче Тываны төлээлеп чоруур кижи болгаш, ол айтырыгны база сонуургаан. Кызылдан Москваже дорт ужуп болурун дыңнааш, дыка амыраан. Тыва Республиканың Күш-ажыл болгаш социал политика яамызының удуртулгазының даалгазы езугаар, яамының социал хандырылга килдизиниң консультантызы Айдысмаа Ооржак Тываның күрүне университединиң филология факультединиң 2-ги курузунуң студентилери волонтерлар-биле кады тылдың ишчизи Нина Петровна Демихинага дуза көргүзүп четкеннер. Нина Петровна орден-медальдарын камныг чодуп, ооң чуртталгазында эң кол байырлал – Тиилелге хүнүн төлептиг уткуур деп турарын республика Баштыңы-биле ужуражылга үезинде чугаалаан. 

Тываның күрүне университединиң студентилери “Хоочунга дузалаш” акция-биле тылдың хоочунунга дузалашкан. Нина Петровна арыглаашкын соонда, чайынналдыр чырый берген медальдарлыг костюмун кедипкеш, аныяктар-биле кады чурукка тырттырган.