Тываның Баштыңы үерлээшкинге удур команда-штабтыг өөредилгени эрттирерин айыткан

«Чылдың үе солчулгазы эгелээн. Хөй чылдарның хайгааралындан алгаш көөрге, бо чылын агаар-бойдус элээн өскерилген бооп турар. Республика девискээринде харның дүшкени дески эвес, төп кожууннарда харның кылыны бир метр хире бар. Ынчангаш онза байдалдар болурун манап олурбайн, шупту күштер амдыгааштан команда-штабтыг өөредилгени чорудар дугайында Республика Чазааның айтыышкынында атты салдым. Кижилерниң белеткелин хынап, ажылдарга хаара туттунар курлавырларның санаашкыннарын таптыг анализтээр херек. Онза байдалдарны болдурбас дээш, күрүне органнарындан хамааржыр бүгү-ле херек чүүлдерни кылып, планнаттынган шупту акша-хөреңгини чөптүг ажыглаар. Туруп болгу дег чүүлдерни өөредилге үезинде илередип, ону дарый шиитпирлээриниң аргаларын тывар. А эң кол чүве – байдалдың канчап турарын чонга үе-шаанда дыңнадыры болур. Час дүжүп, агаар чылып келгени-биле кады, чаңгыс чер-чурттугларым крышаларындан харларын дүжүрүп алыр дээн ышкаш ажылдарны боттары кылып алырынга бүзүреп артым».