Тываның Баштыңы Чадаана хоорайда сугга алыскан черлерге четкен

Кожуунда муниципалдыг деңнелдиг онза байдалды чарлап, сугга алыскан бажыңнар чурттакчыларын түр када чурттаар черлерде хувааган. Хемниң унун аар орук техниказы-биле үстүрген. Республика баштыңының дилээ-биле, камгалакчыларга база орукчуларга дузалажыр дээш, 55-ки мото-адыгжы бригаданың шериглери доштарны чазылдырып, хем суун чайган. 

Ажылдың түңнели бар-даа болза, дүне соок күштүг болганындан, суг катап дошталдыр доңа берген. Сугга алыскан бажыңнарның подвалдарында сугнуң деңнели чавызаанын специалистер дыңнаткан. 

Тываның Баштыңы Шолбан Кара-оол эвакуация пунктуларының ажылын хынап, сугга алыскан бажыңнар чурттакчылары-биле ужуражып, аъш-чем аймаан дамчыдып, уругларга белектерни сунган. Оон аңгыда бажыңнар ээлеринге хөмүрнү, одаар ыяшты база ижер сугну чедирген. 

Республика Баштыңы штаб кежигүннерин дарый чыып, хуралды эрттирген. Бульдозерлер болгаш өске-даа техника аймаан Чадаанаже немей эккээр даалганы берген. Чадаана хоорайның чурттакчыларын ол ажылдарже мөөңнеп, чогуур дериг-херекселдердер-биле хандырарын кожуун чагыргазынга онааган. Тускай техника-биле өскээрден ажылдап келген ажылчыннарга чемненилгезинден эгелээш, дыштанып алырынга чедир бүгү-ле байдалдарны тургузарын чагаан.

 Онза байдалдар чайладыр комиссияның удуртукчузу, Тываның вице-премьери Олег Бадыга камгалал бөлүктериниң хүнде кылган ажылдарын, ам чүнү канчаарының дугайында хоорайның чурттакчыларынга болгаш республика чазаанга хүннүң-не илеткээр даалганы берген.