Тыва Республиканың Дээди Хуралының депутаттары республика Баштыңының айыткалынга хамаарыштыр

Тываның Баштыңы Шолбан Кара-оол декабрь 12-де Тыва Республиканың Дээди Хуралынга чылдың-на бээр айыткалын кылган. Аңаа чазак кежигүннери болгаш парламент депутаттары, муниципалдыг тургузуглар удуртукчуларындан аңгыда, эрге-чагырганың федералдыг девискээр органнарының төлээлери, хөй-ниити каттыжыышкыннарының база организацияларның баштыңнары киришкен. 

Айыткал таныштырган ёзулалдың киржикчилери программалыг документиге хамаарыштыр үзел-бодалын үлешкен. 

Вера Левина, Тыва Республиканың Дээди Хуралының депутады: - Төрээн Тожу кожуунумче чырык шугумун тудар дугайында дыңнааш сеткилим өөрүп тур, чүге дизе чырык хандырылгазы – дизельдиг генератор-биле чурттап турар бистерге эң чугула айтырыг. Бо хонуктарда эгелээр көвүрүг тудуу, муниципалдыг тургузугларны хөгжүдериниң чаа программалары - муниципалдыг эрге-чагыргага үре-түңнел дээш ажылдаар арга-дыр. 

- Айыткал көдээ черлерни хөгжүдеринче, ооң чурттакчыларын деткииринче кичээнгейни углаан. Ол ындыг болур ужурлуг. Чурттакчы чоннуң 48% – суурлардан. Олар, хан системазы ышкаш, бүгү республиканы чемгерип, азырап турар. Ынчангаш 2020 чылда “Чурттап турар суурум” төлевилелди уламчылаар болганы эки-дир. Аныяктарга “Күзеп бода. Чогаадып кыл. Шимченип эгеле” дээн ышкаш, чаа-чаа төлевилелдер немешкен. Азы частырыг кылгаш, ам таптыг чуртталгаже эглип келиксээн кижилерге төлевилел-дир. Олар “Чаа сорук” деп төлевилелге киржип болурлар. Ону дыка эки деткимче деп санаар мен. Кадык амыдыралче каттыжарынга дузалаар “Эзирлер уязы” деп солун төлевилел база эгелээр.