Тываның Баштыңының айыткалының дугайында Айдын Дун – аарышкылыг айтырыглар хажыызынга артпаан

Тываның Баштыңы Шолбан Кара-оол декабрь 12-де Тыва Республиканың Дээди Хуралынга чылдың-на бээр айыткалын кылган. Аңаа чазак кежигүннери болгаш парламент депутаттары, муниципалдыг тургузуглар удуртукчуларындан аңгыда, эрге-чагырганың федералдыг девискээр органнарының төлээлери, хөй-ниити каттыжыышкыннарының база организацияларның баштыңнары киришкен. 

Айыткал таныштырган ёзулалдың киржикчилери программалыг документиге хамаарыштыр үзел-бодалын үлешкен. 

Айдын Дун, Тыва Республиканың көдээ ажыл-агый сайыдының оралакчызы: 

- Тываның Баштыңының Айыткалында өзек айтырыгларны, ону шиитпирлээриниң оруктарын айтып, ведомстволарга даалгаларны берген. Арагалаашкын-биле демисел, хөмүр өртээ, социал айтырыглар дээн ышкаш аарышкылыг айтырыглар кичээнгей чок артпаан. Сылдангылыг уругларның аарыынче, профилактиканы канчаар чорударынче кичээнгейни салган. Суурларже аныяк специалистерни хаара тудар дээш, аныяктарны деткиир мурнады боттандырар айтырыгларны көдүрген. “Албан чериниң чуртталга бажыңы” программаны ол дээш эгелээн. Бурунгаар улуг идигни бээр Тываның социал-экономиктиг шапкын хөгжүлдезиниң программазы – эң кол төлевилел болур. Беш-чеди ай дургузунда малды дүрген доруктур азыраарынга суг, хоолулуг чем-биле хандыртырган мал семиртир үш шөлдү Барыын-Хемчик, Чөөн-Хемчик, Кызыл кожууннарга тургузар эгеки төлевилелди боттандырар акша-хөреңги тускайлаттынган.