Ирина Бадыргы Тываның Баштыңының Айыткалының дугайында: социал инициативалар шугумунда чаа чүүлдер немешкен

Тываның Баштыңы Шолбан Кара-оол декабрь 12-де Тыва Республиканың Дээди Хуралынга чылдың-на бээр айыткалын кылган. Аңаа чазак кежигүннери болгаш парламент депутаттары, муниципалдыг тургузуглар удуртукчуларындан аңгыда, эрге-чагырганың федералдыг девискээр органнарының төлээлери, хөй-ниити каттыжыышкыннарының база организацияларның баштыңнары киришкен. 

Айыткал таныштырган ёзулалдың киржикчилери программалыг документиге хамаарыштыр үзел-бодалын үлешкен. 

 - Чоокку үш чылдың бюджеди айыткалда айыттынган өг-бүлени деткиир, ооң каттышкан орулгазын көвүдедир социал программаларже угланганы дыка кол. Социал дузаның чаа пакеди дээн ышкаш ындыг чаартылгалар ол сорулганы чедип алырынга чедимчелиг арга болуп турары солун. Ону адрестиг кылыр дизе, ону алыр тодаргай өг-бүлениң орулгазынче кирип турар пособиелер база чиигелделер кандыг салдарлыын чиге көөр херек. 

Келир чылда “Чемгерикчи инек малым”, “Аныяк өг-бүлеге кыштаг”, “Социал хөмүр” , “Социал картошка” төлевилелдерни уламчылаары эки-дир. Республиканың баштыңы база чазаа эң-не аарышкылыг айтырыгларны көрүп, ол дээш чымыштыг ажылдап турар-дыр деп билзе чогуур. Ынчангаш социал инициативалар шугумуда чаа чүүлдер немешкени ол. 2020 чылда эгелээр “Чаа сорук” төлевилелди чугаалап тур мен. Амгы үеде эрлер ортузунда олуруп чораан кижилер хөй. Бир эвес оларга келдерелге идегелди бербес болза, база катап-ла кем-херекти үүлгедип, редицивист кижи апарып, ниитилелден ырай бээриниң айыылы бар.